„Укради“ му титула на Работнички и потоа исчезни
Расформирањето на Никол Ферт од пред неколку години и најавите дека по ист пат може да тргне и Струмица наведува на заклучок дека во македонската кошарка владее своевидно „проклетство“ што ги стигнува клубовите што доаѓаат до шампионската титула, а чие име не е Фершпед Работнички. Скопјани 13 пати досега дојдоа до победничкиот пехар.
Никол Ферт во 2000 година прв ја прекина доминацијата на „шпедитерите“, но само неколку години по големиот успех клубот престана да постои. Тогашниот сопственик на „челичните“ Леонид Гајдаџиев западна во финансиски проблеми поради што тимот преку ноќ престана да постои. Струмица, пак, е на најдобар пат да заврши идентично како гостиварци. Колективот од југот на Македонија лани во плејоф-финалето беше подобар токму од Работнички по што првпат во клупската историја дојде до победничкиот пиедестал и тоа како трет шампион во самостојна Македонија.
- Далеку од тоа дека некој навистина помислува дека има некое проклетство поврзано со шампионите што не се Работнички. Сепак има некоја чудна коинциденција, која никој не сака да поверува дека не е случајна. Штета е тоа што се случи со Никол Ферт, а уште поголема штета ако истото ја снајде Струмица, во моментите кога кошарката бележеше огромен подем во овој град - се зборува во кошаркарските кулоари.
Деновиве од југот на Македонија доаѓаат најави дека поради финансиски проблеми Струмица им дава одврзани раце на играчите што имаат договор (Диме Тасовски, Дарко Соколов, Виктор Крстевски, Дејан Вегов и неколку помлади кошаркари) и дека речиси сигурно следната сезона нема да играат во домашното првенство. Претходно, струмичани беа избришани од настап во Балканската интернационална кошаркарска лига (БИБЛ).
- Во моментов Струмица нема управен одбор, а јас сум последниот што го напушта бродот што тоне. Доколку некој сака да го преземе клубот, има отворени врати за тоа, но во моментов нема таков човек. Жално е што ќе завршиме на овој начин, но тоа е реалноста - вели Панајотис Карапиперис, сега веќе поранешниот претседател на Струмица, тимот што лани играше во двете домашни финалиња.
Луѓето од кошарката, најчесто на шега, велат дека следен на ред за да го почувствува ова „проклетство“ е актуелниот шампион Фени индустри. Ако Струмица навистина престане да постои, тогаш кавадарчани ќе останат единствениот активен шампион на Македонија, покрај големиот Работнички.
- Не сме суеверни за да се плашиме од некаквоси проклетство. Веруваме дека со добра работа и адекватно искористување на ресурсите ќе можеме да ја надминеме секоја проблематична ситуација. Не велиме дека сме вечни, но ќе треба да се случат многу големи проблеми за Фени И. да се најде во ист кош како и Никол Ферт или Струмица, на која и посакуваме да ја надмине кризата и повторно да биде дел од македонската кошаркарска елита - велат во таборот на кавадаречкиот прволигаш.
Одамна ги нема и вицешампионите Кочани, Ж. Вардар, Куманово...
Таканареченото „проклетство на најдобрите“ лесно може да се прошири и на екипите што не дошле до шампионската титула, но биле на само мал чекор до неа. На кошаркарската мапа на Македонија одамна ги нема вицешампионите Кочани Деликатес, Жито Вардар и Куманово, екипи што во минатото играле во финална плејоф-серија против неприкосновениот Работнички во која секогаш биле поразувани. Тие се расформираа само една или две години по остварувањето на најголемиот клупски успех, играњето во дуелот за шампионската титула.
Он уште на полусезона ке се откажеше од спонзорство...Инспекции секој ден во клубот,секој ден во неговата фабрика...Ама шо да праваш таков е СТРУМИЧКИО НАРОД !!!Киро Јанев е подобар. ц.ц.ц.ц.ц.цц.
