Невработеноста паѓа само статистички
Според Државниот завод за статистика, во декември лани невработеноста се намалила за 3,7 отсто и покрај постојаниот пад на индустриското производство и затворањето погони и фирми поради економската криза Државните институции не може да се договорат дали невработеноста во земјава расте или опаѓа. Според последните податоци што ги објави Државниот завод за статистика, на крајот од минатата година невработеноста се намалила за 3,7 отсто, а Агенцијата за вработување пресметала дека во декември имало 0,8 отсто повеќе лица без работа отколку во претходната година.
Така, повеќе од 40.000 лица станаа невидливи за Државниот завод за статистика, која објави дека во декември имало 298.873 невработени лица. Агенцијата за вработување изброи дека кај неа се регистрирани 341.295 лица. По долго време, тоа беше првпат Агенцијата за вработување да објави пораст на невработеноста. И покрај континуираниот пад на индустриското производство и затворањето погони и фирми поради економската криза, статистиката покажуваше континуиран пораст на вработеноста.
Двете државни институции постојано излегуваат со различни информации за бројот на невработените во земјава, поради што практично е невозможно да се одреди колку точно лица во земјава немаат работа. Од Државниот завод за статистика и Агенцијата за вработување објаснуваат дека различните податоци се должат на различната методологија на пресметка. Статистика ја мери фактичката состојба, а Агенцијата за вработување ги брои сите што се забележани во административните документи.
Во Сојузот на синдикати на Македонија (ССМ) се сомневаат во бројките на двете институции. За синдикалците е несфатливо како може статистиката да покажува пад на индустриското производство, а истовремено зголемување на бројот на вработените во индустријата.
- Само во текстилната и металската индустрија во последните неколку месеци беа затворени 10.000 работни места, така што бројката е многу поголема. Дури ни државните институции не можат да се договорат колку невработени има во земјава и не ја кажуваат точната информација бидејќи е поразителна. На бројките од Агенцијата за вработување се додадат уште најмалку 30.000, ќе се добие вистинската бројка - велат во Сојузот на синдикатите.
Оттаму тврдат дека намалувањето на невработеноста се должи на бришењето од списоците за евиденција на невработените, кои наводно не ги исполнувале условите, што е вештачко зголемување на вработеноста.
Според Државниот завод за статистика, на крајот од минатата година стапката на невработеност била 32,2 отсто, со што е една од највисоките во регионот. Единствено повисока стапка на невработеност има Босна и Херцеговина, каде во ноември изнесувала 42,4 отсто. Од земјите во регионот, Бугарија е во најдобра положба со стапка од 9,13 отсто. Следат Словенија со 10,3 отсто, Црна Гора со 11,17 отсто, а Албанија во септември имала стапка на невработеност од 12,76 отсто. Нешто поголема е невработеноста во Хрватска и Србија, каде стапките се 16,7 и 16,6 отсто.
Во Македонија минатата година најмногу откази беа поделени во металската, текстилната и кожарската индустрија. Последниве месеци многу сопственици на фирми што добија казни од Управата за јавни приходи по различни основи, се пожалија дека ќе мора да отпуштат дел од вработените бидејќи казните се преголем товар за нив. Последните информации за бран отпуштања доаѓаат од угостителите, кои трпат последици од забраната за пушење. Неодамнешната анкета покажа дека 59 отсто од сопствениците на угостителските локали веќе отпуштиле или планираат да отпуштат работници, а 29 отсто ќе донесат таква одлука во следните неколку месеци.
извор:Дневник
Интересантно
