Мухамед Зекири, македонски државјанин на возраст од едвај 18 години и 4 месеци неколкупати бил на боиштето во Сирија. Закири е уапсен во Турција вчера, тој е еден од тројцата обвинети за терористичкиот напад во турска Анадолија извршен пред 5 дена, објавија турските медиуми. Во нападот во кој загинаа полицаец, воен офицер и еден цивил, а 5-мина се повредени учествувал Закири. Покрај македонскиот државјанин во нападот учествувале и двајца жители на Косово од кои едниот имал швајцарски пасош. Тројцата се враќале од Сирија, на полициски контролен пункт на автопатот во турската област Нигде, наместо да застанат со калашњиков почнале да пукаат кон полицајците, офицерите и возачите од околните возила.
- Кога ги сопре полицијата, тие веднаш почнаа да пукаат. Неколкумина војници и полицајци паднаа како покосени. Тогаш напаѓачите излегоа од нивното возило, грабнаа еден паркиран камион, го убија возачот и побегнаа, изјави очевидец.
Двајца од напаѓачите се уапсени неколку часа по нападот, а при префрлање во болница за малку ќе беа линчувани поради терористичкиот напад. Во турските службени лица пукал косовскиот Швајцарец Чендрим Рамадани додека вториот уапсен на судот се бранел дека Рамадани извадил пушка и почнал да пука кон пунктот без тој да може да реагира. Македонскиот државјанин Мухамед Закири е уапсен вчера.
Македонската полиција била известена за неговото учество во нападот во рамките на добрата македонско - турска полициска соработка. Закири е роден на крајот на 1995-та година во Охрид, а учел медреса во Тирана. Првпат за Сирија заминал во 2011-та година и според податоци на безбедносните служби Закири неколкупати одел и се враќал од фронтот. Турските медиуми објавија дека групата била дел од радикалните структури блиски на Ал Каеда. Во камионот со кој се враќале кон Балканот носеле три пушки, пиштоли, гранати и воена опрема. Убиецот Рамадани пред суд изјавил дека нападот го извеле во име на Алах и затоа што Турција е дел од НАТО. Последните неколку месеци турските власти заедно со сириската слободна армија имаат зачестени акции против радикалните исламисти кои патуваат и се борат во Сирија. Во една таква акција загина уште еден млад македонски Албанец наводно затоа што сакал од слободната сириска армија да премине кај џихадистите.
