Зимското засилување на Реал Мадрид
Алваро Медран е прекомандуван во првата екипа на Реал, додека Лука Модриќ е отсутен поради повредата. Ова го потврди денес Анчелоти на прес конференцијата. Медран, кој веќе одигра 3 натпревари за првата екипа сезонава, има карактеристики идентични на Лука Модриќ, а во кантерата веќе го нарекуваа "Лука Модриќ од La Fabrica". Минатата сезона тој беше најдобриот играч на Реал Мадрид Ц, а оваа сезона еден од најдобрите во Кастиља на Зидан.
На овој начин, Реал ги разреши сите дилеми околу повредата на Модриќ и евентуално можно засилување во јануари. Анчелоти потврди дека засилувања нема да има, исто како што нема да има ниту заминувања. Италијанецот го очекува Хесе за најмногу еден месец во комбинација за настап и уште еднаш потенцираше дека тој е многу важен играч за Реал Мадрид. Исто така, тој потврди дека во разговор со Сами Кедира дознал дека германецот мисли само на останување во Мадрид и дека наскоро ќе биде потпишан новиот договор. Со Кедира, Иљара и Медран, заедно со Крос, Анчелоти смета дека одлично е покриена позицијата на центарот на теренот.