КАБРАН АМБАЛАЖА СОЗДАВА КОНКУРЕНТЕН ТИМ ЗА ТИТУЛАТА ВО СУПЕР ЛИГАТА
Шампионско Кавадарци со Радуловиќ и Платон
Екипата на Кабран Амбалажа вчера приреди вистински бум со информацијата дека ги ангажираше двете искусни ракометарки кои лани ги бранеа боите на екипата на Ѓорче Петров, Валентина Радуловиќ и Анжела Платон. И двете од вчера се членки на суперлигашот од Кавадарци со што тимот на Кабран Амбалажа станува конкурентен за шампионската титула.
Искусните репрезентативки кои веќе го ставија договорот за својот нов тим се очекува да донесат и пренесат дел од шампионскиот дух кој го носат во себе, а тоа значи дека доколку на кавадарчанки им се укаже можност ќе атакуваат и на шампионската титула.
Ова ни го потврди и претседателот на клубот Миле Масларков кој не го криеше задоволството од постигнатите договори:
"Да, точно е. Се договоривме и потпишавме договори со Радуловиќ и со Платон. Нивното искуство треба да биде мотив повеќе за сите во клубот, а доколку ни се укаже можност сигурно ќе ја нападнеме и шампионската титула на Ѓорче Петров. Меѓутоа ние нема да застанеме со нашата работа и веке сега најавувам дека најмногу за месец дена ке ангажираме уште две супер звучни засилувања со кои веќе ги стартувавме преговорите. Имиња нема да откриваме додека истите не го потпишат договорот. Сакаме од Кавадарци да направиме вистински ракометен центар, да ја вратиме публиката во салата и оваа сезона на сите наши натпревари очекувам салата 'Јасмин' да биде исполнета до последно место", не информираше Масларков кој беше во вистинска бркотница бидејќи мораше да го подготвува новиот список за Холандија за средбите од Челенџ купот.
Според последните информации дебито на Радуловиќ и Платон во дресот на Кабран Амбалажа ќе се случи веќе во недела на дерби натпреварот со Металург Скопје. Уште на стартот на првенството Кабран Амбалажа се водеше како еден од кандидатите за висок пласман. Со Радуловиќ и со Платон, како и со најавените засилувања кавадарчанки не само што им ги поматија сметките на многу екипи туку на сите јасно им ставија до знаење дека сезонава нема шегување со екипата на Кабран Амбалажа.
Инаку, тимот одлично стартуваше во првенството. Успеа да избори Три победи во исто толку натпревари, а совладани се конкурентите за висок пласман Вардар Осигурување и Кале Кичево. Амбициите на клубот на стартот на првенството беа освојувањето на вицешампионското место и се разбира достоинствено презентирање на македонскиот ракомет во европскиот Челенџ Куп. Меѓутоа актуелните збиднувања во македонскиот ракомет, цврстата финансиска подршка од спонзорот и помошта која клубот ја доби од неколку други фирми како "Кожувчанка-Синалко" и "Вино Жупа" - Александровац ги зголеми клубските амбиции. Времето ќе покаже колку од плановите ќе бидат сработени, но очекувањата се годинава да се забележи најдобриот пласман досега во натпреварите во Супер лигата.
М. Виденовиќ хоохохохохохохихихи
Вале на две, Анжела една година
Двете искусни ракометарки кои продолжуваат со кариерата во Кабран Амбалажа имаат различни договори. Капитенот на женската репрезентација на Македонија, Валентина Радуловиќ се обврза на верност од две години, додека Платон ќе биде дел од тимот на Кабран А. само една година.
Зголемени амбиции и во Челенџ купот
Со ангажирањето на новите засилувања, но и планот во тимот да има уште едно до две нови имиња, амбициите на клубот се зголемени. Пред с$ акцент ќе биде ставен на настапот во Европа, каде Кабран Амбалажа игра во Челенџ купот. Целта е да се стигне колку што е можно подалеку во овој куп, а првиот настап ќе го имаат на почетокот на октомври во групата од квалификациско коло. Гостуваат во Холандија на тимот на Фортисимо кој е домаќин во групата каде се уште и Железничар од БиХ и Хазена Храдец од Чешка.