Повиците на релевантниот (од аспект на стратегиските надворешно-политички определби на Р Македонија) меѓународен фактор за спроведување на фер и демократски избори, не беа охрабрувачки: очигледно, нашата држава сеуште се перцепира како незрела демократија. Поразително, не успеавме да го докажеме спротивното. Исклучок беше казнувањето (и тоа најчесто благо) на сторителите на инциденти во претходните изборни циклуси; ова, а и, меѓу другото, присуството (нелегално, во голема мера) на значителна количина на оружје во приватни раце, не придонесоа кон практичната реализација на внатрешно декларираните заложби за фер и демократски избори. Така, првите предвремени парламентарни избори во Р Македонија, не само што го одложија исполнувањето на приоритетните критериуми за добивање датум за преговори со ЕУ, туку и, во тој поглед, значат голем скок (не чекор) назад. Уште повеќе, вчерашен Дневник пренесе оценки во странски весници, според "постои ризик таа земја (Р Македонија) да го дестабилизира Балканот"; одлични оценки, ако се имаат предвид напорите на нашиот јужен сосед не' презентира како фактор на дестабилизација во регионот.
Воопшто не е пријатно сознанието дека, и по седумнаесет години независност и демократско живеење, регуларните избори во Р Македонија се исклучок - не само заради нашите евроатлантски аспирации, туки и заради нас самите. Македонија ќе победи единствено во целосно фер и демократски изборен процес.