Блохин "долетува" како прв кандидат
* Сега Украинецот на патот до македонската клупа има силна лоби поддршка од неговиот сонародник, членот на ИО, Суркис, кој во 2006 ја спасуваше претседателската фотелја на Хаџи-Ристески
Откако е сосема јасно дека досегашниот тренер на белградска Црвена Звезда, нашиот Чеде Јаневски нема да го прифати повеќе од апсурдниот начин, т.н "себепонудување до Хари и ФФМ" во обидот да се стигне до селекторската функција, сам по себе во пресрет на саботниот состанок на УО на ФФМ на кој дефинитивно треба да биде именуван новиот предводник на националниот тим се издвои изборот околу Украинецот Олег Блохин, кој е најсериозен странски кандидат, и селекторот на младата репрезентација, Мирсад Јонуз.
Добар дел од членовите на УО на ФФМ и на минатонеделниот состанок јасно потенцирале дека сепак низ актуелните квалификации за пласман на СП 2010 во Јужна Африка довербата треба да се даде на истакнато тренерско име со завидна зад себе биографија, што некако сега во преден план откако преку своите менаџери и дополнително самиот се понудил "долетува" Олег Блохин.
Според последните информации, предноста на Блохин е и силното лобирање од страна на членот на Извршниот одбор на УЕФА, Украинецот Суркис, кој пред две години пак преку својот нескриен ангажман ја спасуваше претседателската фотелја на Харалампие Хаџи-Ристески. Некако, сакајќи или не, нешто слично претходно како и при изборот на Србинот Слободан Сантрач, повторно двомесечната пародија која ФФМ ни ја сервираше при изборот на нов селектор, се сведува на плаќање на некои "стари долгови" на челниците на ФФМ...
Согласно најавите од канцеларијата на ФФМ, сериозноста на кандидатурата на Олег Блохин треба да биде потврдена денеска. Најавено е негово пристигнување во Скопје на први и финални разговори со претседателот на ФФМ пред и официјалната одлука да ја донесе Управниот одбор в сабота. Блохин, како што дознавме, има гарантирана поддршка од мнозинството членови на УО, наспроти Мирсад Јонуз ,кој има поддршка од мал број членови на највисокото управно домашно фудбалско тело.
Зад 56-годишниот Блохин несомнено, покрај силната лоби поддршка од Суркис, стои и моќна тренерска биографија, што, секако, е негова предност заедно и со финансиските побарувања кои не се ништо поголеми во однос на претходниот селектор, Словенецот Среќко Катанец, во висина од 10.000 до 15.000 евра месечно.
Инаку, прославениот украински ас Олег Блохин, ја има најимпресивната биографија во однос на сите пристигнати кандидатури до ФФМ изминатиов период меѓу кои се оние на Турците Зија Доган и Унел Караман, како и на Србите Остојиќ и Степановиќ. Претходно од "играта" се откажа и Хрватот Бранко Иванковиќ. Како играч Блохин има 112 репрезентативни настапи (42 постигнати голови) за поранешниот СССР, претходно низ својата тренерска кариера беше селектор на Украина во периодот од 2003 до 2007 година, со која во 2006 година стигна до четвртфиналето на Светското првенство. Тренер бил и на грчките прволигаши Олимпијакос, ПАОК и АЕК, како и на рускиот прволигаш ФК Москва.
Состанокот на Управниот одбор на Фудбалската федерација на Македонија на кој в сабота ќе биде избран новиот селектор ќе се одржи во хотелот "Александар Палас" во Скопје, со почеток од 11 часот.
В.Булатовиќ
НАШИОТ ФУДБАЛСКИ СТРУЧЊАК ДО УТРЕ Е ВО СКОПЈЕ
Јаневски: "Сам не се нудам"
По завршувањето на соработката со Црвена Звезда, Чеде Јаневски својот неколкудневен престој во Скопје го завршува в петок. Досега без апсолутно никаков контакт од ФФМ, Јаневски истакнува дека спротивно на неговите принципи и размислувања е сам да се нуди за некаква тренерска позиција, а посебно за селекторското место на својата Македонија.
"Јас утре заминувам за Бриж кај семејството. Не планирам да се нудам на ФФМ затоа што согласно моите размислувања тоа е неприфатлив начин, а објективно и досега несвојствен низ пооделна фудбалска практика. Доколку од ФФМ одлучат дека сепак можам соодветно, ете според нив, да одговорам на селекторскиот предизвик, јас сум на располагање до утре пред моето заминување за Белгија", ни изјави вчера Јаневски, притоа дополнувајќи дека неговите погледи и размислувања за нашиот национален тим нема да се променат.
"Македонија и националниот тим во мене секогаш будат силни емоции. Верувам дека фудбалски можеме многу повеќе на интернационалната сцена. Како и да е, останувам на тоа дека како и секој тренер, согласно сопствените амбиции, еден ден би бил селектор на мојата земја", вели Чеде Јаневски.
Украинецот понудил и атак на втората позиција за место на СП
Како причина за изнесената поддршка од страна на членови на УО на ФФМ за Олег Блохин е и фактот дека Украинецот низ првичните свои амбициозни планови уште за актуелниот наш квалификациски циклус најавил до крај борба за втората позиција во групата која носи бараж дуел за пласман на Светското првенство 2010 во Јужна Африка. Тоа се совпаднува сосема и со планот кој претседателот Хаџи-Ристески отворено го изнесе дека од новиот селектор нескриено ќе се бара атак на второто место, што значи победи веќе на двата наши следни квалификациски дуели против Норвешка и Исланд на "Градски".
Новиот селектор има две недели за размислување
Ако убаво претходниот наш селектор Среќко Катанец од својот дом во Љубљана имаше по неколку месеци во пресрет на секој наш репрезентативен квалификациски собир добро да размисли околу "победничката" наша стратегија, сега новиот селектор, поради "сериозниот" однос на ФФМ при изборот, ќе има две недели за размислување пред новиот репрезентативен собир на 1 јуни во пресрет на дуелите со Норвешка и Исланд. А ние од него силно ќе бараме две победи на следните два наши дуели.
Натпреварот против Норвежаните се игра на 6 јуни, додека против Исланд на 10 јуни. И двете средби на нашиот најголем стадион "Филип 2 Арената" во Скопје се играат со почеток од 17:45 часот.