Од белградско кафуле, ги одвел во директна смрт:"Испив 20 ракии, не знам каде сум!"
24.11.2014 | 14:29
Извор: Точка
Прочитано: 16489 пати
Испрати на пријател
Зголеми го фонтот
Намали го фонтот
Со секој изминат час во јавноста се појавуваат нови детали околу страшната несреќа која им ги одзема животите на тројца млади Белграѓани.
Имено, деветнасетгодишниот Душан Јовановиќ бил зад воланот на “BMW” автомобилот, кој го управувал без дозвола и во алкохолизирана состојба, а кој во директна смрт одвезе три млади лица.
Според досегашните сознанија, автомобилот се движел со брзина од 110 километри на час и од шеталиштето Ада Хуја слетал право во Дунав.
Милица Јокиќ (18), Лука Вишниќ и Душан Јовановиќ, преживеаните во несреќата
Во несреќата која што ја потресе Србија, но и целиот регион, својот живот го загубија Немања Антиќ (18), Милош Јанковиќ (20) и Анастасија Стаиќ (16), повредени се Милица Јокиќ (18) и Лука Вишниќ, додека возачот Душан поминал без никакви повреди.
Според првичните информации на полицијата, шестмината млади Белграѓани биле на забава во едно од белградските кафулиња, а потоа, околу 3 часот по полноќ се упатиле кон друг познат белградски ресторан. Во автомобилот со три врати, еден од настраданите бил сместен во багажникот, затоа што немало доволно место во предниот дел.
Колкава казна го очекува возачот?
Душан Јовановиќ, главен осомничен за страшната трагедија, може да одговара за неколку кривични дела. Според законот, доколку биде обвинет по сите точки, максималната казна на која може да биде осуден е 12 години затвор.
Младиот Душан изгубил контрола над автомобилот, кој според истражувањата на полицијата, се движел со брзина од околу 110 километри на час. Возачот успеал веднаш да исплива на површината, а подоцна се спасиле и Лука и Милица, додека Антиќ и малолетната Анастасија не успеале да излезат од автомобилот, како и Милош, кој лежел во багажникот.
Според зборовите на очевидците, возачот не закочил во ниту еден момент, пред автомобилот да влета во водите на Дунав. Во крвта на Душан биле измерени 0,85 промили алкохол и пројавил агресија, поради што се јавува сомнежот дека тој бил и под дејство на наркотици, што ќе биде утврдено по резултатите од дополнителните тестирања.
“Испив 20 ракии од малина во кафулето. Не знам што се случи, не знам каде се наоѓам”, гласеле првите зборови на Душан пред полицијата, по што му бил одреден и дводневен притвор.
Немања Антиќ (18) и Анастасија Стаиќ (16), двајца од тројцата починати во трагедијата
“Ги убив, како да живеам сега? Подобро и јас да умрев со нив”, викал Јовановиќ пред полицијата, пренесува српски
Курир. Според неименуван извор, откако е однесен во притвор, младиот Душан се соочува со тешки психички кризи.
“Не спие, одбива храна, добива напади на хистерија и речиси не престанува да плаче. Кога ќе се смири, седи во едно место и гледа во една точка, а потоа повторно “пука”. Свесен е дека е единствениот виновник за кобната грешка која неговите тројца другари ги однесе во директна смрт”, навел неименуваниот извор за споменатиот српски магазин.
Автомобилот “BMV”, вреден повеќе од 10.000 евра, во регистарот се води како сопственост токму на Душан Јовановиќ, иако тој никогаш не полагал возачки испит и нема дозвола за управување со истиот. И кај останатите преживеани патници од автомобилот биле пронајдени траги од алкохол во крвта, но тие имале значително помалку промили во споредба со возачот.
.
