Некои глечери на Хималаите не само што не се топат, туку и се зголемуваат а глобалното затоплување не е одлучувачки фактор за тоа дали глечерите ќе “преживеат“ или не, укажува прва поголема студија изработена после контроверзниот извештај на ОН за климатските промени.
Сега научниците од универзитетите Калифорнија и Потсдам откриваат дека половина од глечерите на падините на Каракорам (северозападни Хималаи), всушност се зголемуваат и дека глобалното затоплување нема суштинска улога во нивната судбина.
Со проучување на 286 глечери експертите Бодо Букаген, Дирк Шерлер и Манфред Стрекер воочиле дека главен фактор кој што влијае врз глечерите е количеството на кал и камења што се наоѓаат на површината а не климатските промени.
Научниците објаснуваат дека тоа значи дека глечерите кои се опкружени со високи планини и покриени со повеќе од два сантиметри камења и кал се заштитени од растопување, па според тоа 50% од глечерите на Каракорам напредуваат или се стабилни.
Во 2007-та Меѓувладиниот панел за климатски промени (IPCC) предводен од Раџендра Пачаури од Индија објави дека е спроведено најдеталното истражување за влијанието на глобалното затоплување, при што клучна точка беше тврдењето дека глечерите во светот се топат со толкава брзина, што оние на Хималаите до 2035-та година целосно ќе исчезнат.
Иако раководителот на панелот подоцна призна дека тврдењето било погрешно заради непроверени истражувања, тој не отстапи од ставот дека глобалното затоплување ги топи глечерите.
извор