Дојде и 15 Јануари. Се е спремно за новото ЕП и за неколку часа ќе ги гледаме нашите момци против французките гладијатори. Што значи одличен момент за една кратка прогноза за првенството
група А
Франција - Доминантна во последнава деценија на ракометните терени, на ова првенство оди со осакатена бековска линија. Но додека чичко Карабатиќ е во игра тие сепак се фаворити. Колку Карабатиќ, Нарсис, Мае и Порте сами ќе можат да го понесат товарот на бековската линија ќе видиме (или можеби некој од младите ќе блесне?) но за сепак да бидат фаворити во групата имаат доволно.
Полска - Полска требаше да биде меѓу фаворитите во групата. Домашен терен, одличен избор на играчи, бронза од пред една година... Но како што одминува времето некако не сум убеден дека ќе биде така. Без 2та клучни средни бека (Јашка и Ткачик), како и без универзалецот Јуркиевич, ми се чини дека ќе имаат доста проблеми во нападот. Многу репрезентации се изгореа на сличен начин без брз продорен среден бек последниве години. Друг проблем е и што Шмал не е во којзнае каква форма. Полскиот домашен терен е голема работа и ќе бидат високо пласирани, ама за злато ми се чни дека немаат доволно. Јурецки и Лијевски не можат сами.
Македонија - Нема што многу да се коментира. Веројатно сме подобри од порано со поширока клупа, пораздвижен напад, но сеуште имаме 2 јасни слабости - голман и лев бек. Во една тешка група моја прогноза е дека се ќе зависи од тоа како ќе се покажеме во одбраната - која последно време е во надолна линија, но искрено треба да бидеме задоволни со пласман во втор круг и со тоа надминување на прогнозите на обложувалниците кои сметаат дека сме 13та селекција.
Србија - Со доста изменет и подмладен состав, Србите влегуваат и со доста изменети амбиции на ова ЕП. Мислам дека оваа екипа игра доста покомпактно и Периќ од оваа група колку толку ќе го извади максимумот но прашање е колкав е тој максимум. Особено ако немаат расположен голман (а формата на Станиќ е под голем знак прашалник) ќе имаат доста проблеми. Генерално ќе бидат опасни против сите но тешко може да се надеваат на некој повисок пласман.
распоред во групата:
Франција
Полска
Македонија
-----------------
Србија
група Б
Хрватска - Подмладена, со нов селектор, прашање е колку ќе може Хрватска да го одржи тој чекор со останатите од големата четворка. Искрено, освен Сулиќ, ова им е горе долу најдобриот состав кој може да го извадат моментално без олгед што се помлади добар дел од играчите, но големиот број на повреди, ми се чини дека ќе си го направат своето и Хрватска иако нема да биде катастрофа, сепак ќе има незбележителен настап на првенството.
Исланд - Можеби за првпат исланѓаните на првенство доаѓаат со целосен тим без сериозни повреди на клучните играчи. На хартија би требало да се многу опасни, но целината некако последниве години не функционира како што треба. Иако патот делува дека им е отворен за историски успех, се ми се чини дека ќе си завршат со некој просечен пласман повторно.
Норвешка - Исклучително млада екипа со светла иднина. Една од најпотценетите екипи на првенството кое може да биде многу опасна. Но не сум убеден дека имаат доволно искуство за некој сериозен пласман. Минувањето на групата не би требало да е проблем, а можно е да изненадат и некој од погорните екипи, но шанси за медал немаат...
Белорусија - Што прави екипа со еден главен играч и доволно просечни за да може да се пласира на првенство, кога главниот играч е во сомнителна форма и во надолен дел од кариерата? А што во случај кога го има најлошиот голмански пар на првенството? Белорусија ја очекува потоп...
распоред во групата:
Хрватска
Исланд
Норвешка
---------------
Белорусија
група Ц
Шпанија - Со добар здравствен билтен, со можеби најдоброто голманско дуо на првенството, и со голема доза на стабилност на екипата, Шпанците се мојот фаворит на ова ЕП. Време им е конечно за европско злато, без разлика што се во тешка група.
Шведска - Можеби и најдобра одбранбена екипа на првенството, но со многу големи проблеми во позициониот напад. Со Ким Андерсон се екипа од светска класа, без него ќе се мачат дадат 25 гола. Имаат доста талентирани млади бекови, но тие сеуште не се дораснати за да играат за медал на европски шампионат. Нивното време доаѓа но засега, иако некои ги прогнозираат високо мене ми се чини дека ќе имаат доста проблеми...
Германија - Со подмладена екипа и со многу повредени играчи Германија е доведена до ситуација каде ќе биде среќна да ја мине групата. Германците во било каков состав се опасни - имаат длабочина за едно 5-6 екипи но јас не би ги вклучил во битката за медали... Очекувам еден просечен настап
Словенија - На прв поглед делуваше дека словенците се спремни да имаат одлично првенство. Но повредата на Доленец мислам дека многу скапо ќе ги чини иако сите портали се истепаа да напишат дека сепак Гајиќ ќе играл и дека Словенците се назад во игра. Гајиќ и нема ништо да им смени покрај Маргуч, Но без Доленец и само еден класичен шутер во цела екипа (Мачковшек - кој и онака не којзнае што) ќе имаат доста проблеми, без разлика какви средни бекови имаат. Наместо втори во групата, сега лесно може да завршат четврти.
распоред во групата:
Шпанија
Германија
Шведска
----------------
Словенија
група Д
Данска - Повредата на Рене Тофт Хансен е голем удар за Данците, но и покрај тоа со Хансен во животна форма, тие се фаворити за медал. Каков ќе зависи од формата на Ландин.
Унгарија - Душебаев пробува да направи промена на генерации и се чини започнува проект на подолг рок. Но и покрај неговото реноме не сум баш убеден дека овој состав може до некој повисок пласман иако имаат лесна група.
Русија - Русите без Игропуло и Деревен, и стандардно без квалитетна одбрана и голман. Ќе играат забавен ракомет но прашање е колку тој ќе биде ефективен. предводени од остатокот Вардарци, очекувам тивок и незабележителен настап.
Црна гора - Млада екипа со многу светла иднина според мене. Но прашање е дали имаат веќе доволно искуство за да отидат чекор напред. Ќе бидат многу потежок орев отколку што некои прогнозираат, но нема да биде лесно да ја минат групата
распоред во групата:
Данска
Унгарија
Русија
Црна Гора
Финален распоред на првенството:
1. Шпанија
2. Данска
3. Франција
4. Полска
--------------------
5. Хрватска
6. Германија
7. Исланд
8. Унгарија
9. Шведска
10. Македонија
11. Норвешка
12. Русија
----------------------
13. Словенија
14. Србија
15. Црна Гора
16. Белорусија
Бонус - што прогнозираат кладилниците
France 2.54
Spain 4.20
Denmark 4.76
Poland 7.25
Croatia 11.50
Germany 25.25
Hungary 26.00
Sweden 30.50
Slovenia 33.75
Iceland 45.50
Russia 69.50
Serbia 94.25
Macedonia 138.00
Norway 150.50
Belarus 513.00
Montenegro 600.67