ПО ОБЈАВУВАЊЕТО НА СТОРИЈАТА ВО ВЕЧЕР
Четирите братчиња од Слп добија бесплатни билети за воз
Генералниот директор Оливер Деркоски, откако ја прочитал сторијата, одлучил Игор, Спасе, Никола и Филип Попови да добијат бесплатни месечни карти до крајот на годинава
По објавувањето на сторијата за маката на четирите деца од велешкото село Слп на страниците на Вечер, голем интерес пројавија поголем број хумани луѓе. Но сепак најзначајно е што Македонски железници - Транспорт реши овие деца да имаат бесплатен месечен возен билет.
Генералниот директор Оливер Деркоски, откако ја прочитал сторијата, одлучил Игор, Спасе, Никола и Филип Попови да добијат бесплатни месечни карти до крајот на годинава. Таткото на децата денеска од МЖ во Скопје ќе ги подигне картите", телефонски не информираше Моника Стефановска од Македонски железници.
До Редакцијата на весникот Вечер и до таткото на четирите деца, Ванчо Попов, пристигнаа поголем број понуди за помош. Хумани луѓе од сите краишта на Македонија се понудија да им ги скратат маките на децата кои секое утро од својот дом во селото Слп, пеш одат до железничката станица ЌРајко Жинзифов" од каде со воз патуваат до Велес да посетуваат настава во осумгодишното училиште ЌВасил Главинов".
Пари, облека, храна ми понудија поголем број поединци и фирми. Ми се јавија од Скопје, Струга, Битола, Тетово, Куманово, Струмица. Ми се јавија од секаде. Срцево ми трепери. Имало добри луѓе што сакаат да им помогнат на моите деца. Не знам како да им се оддолжам на сите нив што сакаат да ги скратат маките на моите деца. Им упатувам едно големо Благодарам. Тоа го имам", со треперлив глас и насолзени очи ни рече таткото Ванчо Попов.
Помош за децата од велешкото село Слп ќе пристигнува и во наредниве денови. Преку социјалните мрежи веќе се формирани групи кои за викендов најавуваат хуманитарни активности, а потоа она што ќе го соберат ќе го предадат на семејството на четирите деца. И тие разговарале со таткото Ванчо за тоа што на децата им е најпотребно дали облека, храна или училишен прибор.
Доколку хуманите луѓе сакаат да контактираат со таткото или пак со Игор, Спасе, Никола и Филип можат да го сторат тоа на телефонот 077 846 037.
(С.А.)
Извор