Едно ретко добро дело на полицајците во соработка со локалниот Црвен Крст
И охридската полиција во акција за спасување на младиот Илија
Велосипедските полициски патроли од утрово делат флаери на кои се испишани телефонски броеви за донација за помош на младиот Илија. Полицајците флаерите ги делат насекаде низ Охрид, во чаршијата и низ сите плажи сè до Свети Наум.
Флаерите ги изработи македонскиот Црвен крст, а полицијата се вклучи во хуманитарната акција за помош на младиот охриѓанец. Ова не е првпат охридската полиција да се вклучува во хуманитарни акции за помош на граѓани. Охридската полиција и лани летото му помогна на младиот Илија со организација на голем хуманитарен концерт, кој се одржа во Домот на културата, а на кој учество тогаш зедоа сите познати музички имиња од Македонија.
Илија Јосифовски има само 17 години и е тешко болен од леукемија. Неопходна му е итна операција во Нирнберг, Германија, која чини 255.000 евра. Фондот за здравство ќе покрие 80 отсто од трошоците, но 20 отсто мора да обезбеди семејството. До вчера семејството Јосифовски имаше обезбедено само 16.000 евра, а за да биде примен нивниот син во болницата во Нирнберг им требаат нешто повеќе од 20.000 евра.
Е.З.
Донирано.