Генерално не сум љубител на темата Алистер Кроули, но ќе коментирам во врска со наводната негова масонска припадност и во врска со феноменот на регуларни и нерегуларни ложи.
Нека прво да објаснам за ложите...
Еден од најбитните аспекти во масонството е регуларноста и меѓусебното признавање. Тоа не е чисто административен чин, туку има длабоки корени во самиот масонски ритуал. Врската со историските корени на масонството мора да постои, како и строго придржување до историските принципи, за да може една ложа да биде сметана за регуларна и призната.
Како репер во светски рамки, многу долго време е сметана Обединетата Голема Ложа на Англија, за денес тоа да биде Меѓународната Комисија за Признавање, составена од претставници на многу Големи Ложи од најразлични земји, но повторно - работејќи според принципите и правилата установени од ОГЛА (UGLE).
Непризнаена ложа, значи ложа која работи според принципите на регуларноста, но има јурисдикциски и административни нарушувања и заради тоа не може да биде признаена - вакви примери има многу.
Нерегуларна ложа - е нешто многу посериозно, затоа што тоа е ложа која се откажала од основните принципи на масонството, и со самото тоа, не се смета за масонска од меѓународното братство. Тие самите, продолжуваат да се сметаат себе си за масони - и се разбира, никој не може да им го одземе тоа право, луѓето се слободни себе си да се нарекуваат како сакаат и да мислат за себе што сакаат.
Во текот на 19-тиот век, и особено во 20-тиот век, се појавуваат десетици такви нерегуларни ложи. Некои се формирани од масони кои биле иницирани во регуларни ложи, но од лични причини (обично од суета или од потреба да бидат водачи) формирале свои ложи. Новоформираните ложи не се регуларни! Затоа што за да се формира една ложа има многу строги правила, кои важат со стотици години и ништо не може да ги промени.
Некои ложи се формирани од луѓе кои себе си се сметале за посветени и сметале дека имаат познавања од масонството - иако никогаш не биле иницирани во ниедна ложа.
Има ложи, кои биле регуларни и признаени, но во еден момент решиле да отстапат од принципите на регуларноста и со тоа автоматски, не само што го губат признанието, туку престануваат да бидат масони. Пример за ова е Големиот Ориент на Франција, кој себе си се смета за масонска организација, но не почитува неколку од Ancient Charges, и соодветно - не може да биде таква.
Со самото тоа што некој е инициран, не значи дека доживотно останува масон. Човек останува масон, со тоа што ќе ги почитува принципите на масонеријата. Ако се откаже од нив - тогаш престанува да биде. Принципите на масонеријата и самиот ритуал се неменливи. Стари се со векови и од нив не се отстапува за ништо и за никого.
Признавањето или непризнавањето на една ложа не е заради политички причини, и не може да се случи заради вољата на Големиот Мајстор или на една група масони. Се случува единствено и само заради и според правилата содржани во Ритуалот и во Ancient Charges.
Во Франција, има 10 Големи Ложи, односно организации кои се сметаат себе си за масонски. Само една е масонска - односно, Големата Национална Ложа на Франција. Ниедна друга не е масонска.
Сега, да се вратиме на Кроули.
Во 1900-тата година, во Мексико, според него (ќе објаснам што значи тоа) е инициран во ред формиран од Дон Хесус Медина, Војвода на Медина и Сидонија. Во истиот тој ред е посветен во 33-та степен. Има два проблеми со ова. Прво - редот на Дон Медина е нерегуларен самиот по себе. Второ - нема никаков доказ за неговото посветување (дури и во нерегуларниот ред), ниту во неговите лични документи (иако неговата архива е дури и претерано детална), ниту пак во архивата на Медина.
Уште еден проблем е што Кроули смета дека со тоа што е посветен, кога ќе се врати во Европа, ќе биде примен во сите останати ложи - за потоа да увиди дека воопшто не е сметан за масон, од ниедна друга масонска ложа - затоа што реално, не е масон.
Во 1904-та година, пристапува кон англо-говорна ложа во Париз, но повторно, ложа која припаѓа на непризнаената и нерегуларната Голема Ложа на Франција (Grande Lodge de France - GLdF). Во оваа ложа ги поминува сите три степени, не само првиот, како што беше напишано некаде на форумов. Но - тоа не го менува фактот дека сепак - тој не е масон, затоа што е член на нерегуларно тело. Да бидеме чесни - има многу голема веројатност дека Кроули воопшто не бил свесен дека ложата во која членува е нерегуларна и дека неговиот статус ништо нема да значи во масонскиот свет, затоа што во таа ложа имало многу странци - особено Англичани и Американци.
Еден од основните проблеми на Кроули во врска со масонството е тоа што тој влегува во ложите со идеја дека знае многу за масонството и дека знае за "вистинското" масонство, и со претпоставка дека тој и никој друг не ја открил вистинската тајна и дека треба да им ја пренесе на сите. Тоест - си има некоја негова верзија во главата за која е убеден дека е единствена вистинска, без разлика што воопшто не кореспондира со вистината, со реалноста и најмалку - со вистинското масонство. Не е единствен таков - вакви случаи има многу во 19-тиот и раниот 20-ти век. Има една масонска поговорка - да мислиш дека знаеш е пострашно отколку да не знаеш!
Не наоѓајќи поддршка дури и во оваа ложа за неговите квази идеи, Кроули ја напушта во 1908-ма година и со тоа престанува да биде дури и нерегуларен масон. Повторувам - регуларен никогаш и не бил.
Потоа, следуваат уште неколку обиди да формира самиот масонски ложи и цели масонски редови, но никаде не е прифатен, затоа што тоа што го предлага, нема врска со масонството. Подоцна, со истите претпоставки, го формира ОТО. Многу членови на ОТО денес, тврдат дека имаат масонски корени - но во реалноста, немаат ништо заедничко со масонството, во ниеден поглед.
Што се однесува до регуларноста, признавањата, иницирањето и слично, беше спомнато дека еден Голем Мајстор на некоја земја може да направи нешто, со што Голем Мајстор на друга земја да не се согласува... воопшто не е така во масонството. Пак ќе кажам - се се води според Ритуалот и има МНОГУ јасни и строги правила. Или се почитуваат и човек е масон, или не се почитуваат и не е масон.
Што се однесува до името и 666. Роденото име на Кроули е - Edward Alexander Crowley. Aleister - е негова лична кованица, ништо чудно да е со цел името да му има одредена нумеричка вредност.
Заборавив да надополнам...
Еден елемент кој предизвикува дополнителна забуна е тоа што француската ложа во која Кроули во 1904-та година се зачленува, во 60-тите години преминува во Големата Национална Ложа на Франција, односно, станува регуларна.
Непознавачите на тематиката, ова го толкуваат како признание дека ложата била регуларна и соодветно, дека и Кроули бил регуларен масон. Не е точно. Ложата била нерегуларна, се до моментот во кој решила да го почне процесот на регуларизација (кој воопшто не е едноставен, ниту лесен), и да премине под јурисдикција на ГНЛФ. Од тој момент, и само од тој момент па натаму - таа ложа и членовите во таа ложа (кои поминале процес на регуларизација) се масони. Претходно - ниеден член на истата таа организација не може да се смета за масон.
