http://www.vest.com.mk/?ItemID=8CD1FC14B44C4A48854E06A8F852D7B7
РАЗГОВОР СО ЕНКО, ВОКАЛОТ НА ГРУПАТА "ЛАСТ ЕКСПЕДИШН"
Поисплатливо е продавање компири од свирење рок
По 15 години, на "Скрим мјузик фестивал" на 11 февруари во "Метропилс Арената" во Скопје, повторно ќе засвират "Ласт експедишн". На скопските рокери кои на крајот на осумдесетите дрмаа со хитот "Шефе", последниот отсвирен риф ќе им каже дали по настапот на 11 продолжуваат понатаму. За искуствата на "Ласт експедишн", зборува вокалот Енко.
Како настана и зошто запре "Ласт експедишн"?
- Бендот почна да работи во јуни во 1986 година, на градскиот плоштад, а може да се каже дека го имавме направено уште од седмо одделение. Тогаш не можевме да си дозволиме електрични гитари, па првите песни ги правевме на мандолини и на акустична гитара. Во составот, тогаш бевме: Сецко, Идриз и Џук. Запревме зашто повеќе немаше смисол да се работи. Во времето кога го издадовме албумот "Бокс", во 1986 година, цветаше пиратерија, а комунизмот беше во полн ек. Сите големи фирми беа демек државни, и тогаш не можеше човек да се потпре на некакви спонзорства. А ако направиш добар албум, и добро го изрекламираш, ќе заработат само пиратерите. На крај излегува дека е подобро да си земеш тезга на Бит пазар и да продаваш компири. И денес времињата не се многу изменети, само што постои институцијата наречена спонзор, Држава, невладина организација или нешто петто. Овде никој не функционира од продажба на билети. Сите чекаат од некоја тетка која работи за некој мобилен оператор да им пушти 500 евра за да снимат спот, или да ги викне некоја невладина организација да свират за денот на пролетта, летото, дрвото или каменот. Тоа им се случи на сите бендови пред и по нас.
Што ве натера повторно да засвирите на 11 февруари?
- Па ми се јави една вечер Јован Јованов, и ми вика: Бате Ене, па ти си свирел. Јас му велам да. Утре дента пиевме кафе и за 5 минути се договоривме. Ми се допадна неговиот однос, бидејќи тој знаеше каков бенд сме.
Има ли во денешно време ликови како оние во спотот на "Шефе"? - Не знам точно кој лик те интересира. Дали за џандарорт или некој друг. Ако мислиш за нашата полиција таа е се поубава и поубава. Ако мислиш на ликовите што се во спотот, тогаш тие ликови се неповторливи. Постои идеа на 11 февруари да се појави целата екипа од спотот.
Размислувате ли за повторно собирање, макар и наменски?
- Искрено да ти кажам, тоа е непознато за сите. Уште на првата проба се виде дека старите песни немаат загубено од свежината. Може да се случи ова да биде последниот концерт на "Ласт експедишн", тоа ќе го знаеме кога ќе го удриме последниот риф на "Скрим мјузик фестивал".
