ЈП ''УЛИЦИ И ПАТИШТА" ЗАДОВОЛНИ ОД ПРВИТЕ ЕФЕКТИ ОД КАМПАЊАТА-ПРИЈАВИ ДУПКА
Жешка линија 15300
За овие четири дена имаме вкупно 200 повици, од кои повеќето се општински и се повторуваат. Според многуте добиени повици можеме да кажеме дека акцијата има одличен старт. Тоа значи дека граѓаните ја прифатиле, а тоа на нам ни е најважно
Кампањата "Пријави дупка", која својот старт го одбележа со билбордите кои можат да се видат на најфрекфентните градски сообраќајници, за само неколку дена ги вжешти телефонските линии на ЈП "Улици и патишта". Тоа значи дека
бесплатниот телефонски број 15300, кој е специјално отворен за граѓаните да пријават проблеми на која било улица во градов во текот на 24 часа, веднаш го оправда своето постоење. Од Одделението на јавност на ЈП Улици и патишта" откриваат дека телефонот постојано ѕвони, а операторите кои го преземаат повикот нонстоп работат и комуницираат со граѓаните.
- Реакциите на граѓаните се позитивни и задоволни се што можат да бидат во непосредна интеракција со нас и на тој начин да допридонесат во решавањето на проблемите на улиците во сообраќајот. За овие четири дена имаме вкупно 200 повици, од кои повеќето се општински и се повторуваат. Досега најмногу пријави има за улицата Првомајска" кај пругата, на улицата Сава Ковачевиќ" и Самоилова", кои во најкраток можен рок ќе бидат санирани. За сите улици кои се под наша надлежност реагираме веднаш, но кај оние под чија надлежност се општините помагаме со тоа што информацијата ја проследуваме до општината за да ја санираат дупката, велат од "Улици и патишта". Оттаму велат дека за подобар ефект имаат дадено и рок во кој ќе ја санираат дупката, но тој е даден ориентациски за да се информираат граѓаните. Но, тоа не значи дека тој е фиксен, бидејќи екипите од претпријатието меѓувремено се ангажирани и на други проекти, појаснуваат одговорните.
Постапката која треба да ја следат жителите е следна: се јавува граѓанин на 15300 и пријавува проблематична дупка, позивот го презема операторот и ја проверува улицата. Под ова се подразбира дали пријавената улица е под надлежност на ЈП Улици и патишта" за да потоа повикот се пренасочи кај одговорните техничари за бригадите на терен кои пак го прават планот за санација, односно ги пуштаат екипите во санација на дупките. Освен телефонскиот број контактот се изведува и преку меил на новоотворената интернетска страница
www.uip.gov.mk , во апликацијата Пријави дупка.
- Според вжештената линија и многуте добиени повици, можеме да кажеме дека акцијата има одличен старт. Тоа значи дека граѓаните ја прифатиле, а тоа на нам ни е најважно, додадоа од Улици".
АНКЕТА
Дали би пријавиле дупка на телефонот 15300 и дали верувате дека истата ќе биде санирана?
Трајанка Атанасова
Искрено не сум чула за овој проект на ЈП "Улици и Патишта", но доколку е така, тогаш го поздравувам. Сметам дека е одличен потег и дека со него ќе се санираат повеќето дупки во градот. Доколку видам дупка, секако дека би пријавила. А што се однесува до тоа дали верувам, не можам да кажам со сигурност. Единствено ни останува да се надеваме.
Филип Толевски
Јас пред некој ден видов билборд за оваа капмања и ми се допаќа идејата. Кај мене во маало има проблематични дупки, кои им создаваат проблем на возачите. Мислам дека луѓето често ќе го вртат бројот, бидејќи дупките се проблем во секоја општина. Јас сеуште се немам јавено ама во иднина ќе го сторам тоа.
Горјан Груевски
За кампањата дознав преку медумите. Ми се допаѓа идејата но искрено сум скептик дека таа ќе помогне во санирањето на дупките. Јас не би се јавил на бројот, ниту пак би пријавил. Доколку навистина ги санираат дупките за два дена по пријавеното, тогаш секоја чест.
Иво Ивановиќ
Јас живеам во Тафталиџе и ние немаме вакви проблеми. Дупките оддамна се минато кај нас. За кампањата дознав преку билбордите низ градот и ми е драго што постои ваков проект. Доколку забележам проблематична дупка или некоја крпеница тогаш би се јавил да пријавам.
Извор: Вечер
ке се јавам утре и да видам шо ке напраат ме интересира.