Софија злоупотребува еден документ за да докаже дека македонската нација е коминтерновска творба. Препораките што му ги дала Коминтерната на ЦК на ВМРО (Об) во Резолуцијата од 1934 година ги квалификува како признавање на македонската нација. Ова го истакна академик Иван Катарџиев, кој вчера во МАНУ со аргументи ја демантира големата бугарска лага.
„Во Резолуцијата на КИ од 1934 година нема и не можело да има ни збор за признавање на македонската нација и македонскиот јазик, нешто што нашите ’пријатели‘ одамна, а и денес го пропагираат“, рече познатиот историчар во својата беседа.
Катарџиев вели дека од објавувањето на Резолуцијата во „Македонско дело“ и особено по прогласувањето на македонската држава во „Св. Прохор Пчински“, против македонската држава, нација и јазик, против македонскиот културно-национален и државен идентитет се води жестока пропаганда.
Според него, таа антимакедонска пропаганда добива екстремен карактер и во еден момент се става во функција на мрачните планови за елиминирањето на македонската држава, нација и јазик.
„Логиката за тоа е едноставна: македонската држава економски е слаба, меѓународно не е асоцирана, има изострени меѓуетнички проблеми, внатрешно не е консолидирана, поради што со примената на разни средства, од блокада на границите до забрана на употребата на името, нејзиниот слом ќе биде неизбежен“, подвлекува македонскиот историчар.
Катарџиев во својата беседа посебно се задржа на најновите негации на Софија, која застана на страната на агресивната грчка кампања против Република Македонија пред Самитот на НАТО. Пред средбата во Букурешт, повеќе од 25 познати бугарски интелектуалци, професори, дипломати, аналитичари и специјалисти подготвија препораки за бугарската политика спрема Македонија, во кои се преповторуваат познатите тези дека македонската нација и држава се создадени според српска политичка конструкција, поддржана од Комунистичката интернационала во 1934 година и подоцна реализирана од Тито.
Според Катарџиев, оваа теза, всушност, е основа врз која авторите на препораките ја градат својата теорија за денешна Република Македонија, за чие основно население тврдат дека со векови било бугарско. „Немам ни најмалку желба да навлегувам во дебата со една схоластичка теза, не само поради нејзината неинвентивност и досадна, речиси едновековна, тавтологија. Она на што во овој момент би сакал да укажам е дека повикувањето на Резолуцијата на КИ е најобична манипулација на еден документ на КИ, во чија содржина не може да се најде ништо од тоа што се тврди за него“, вели македонскиот академик.
За да ги демантира софиските конструкции, Катарџиев објаснува дека оваа резолуција е објавена како резолуција на Централниот комитет на ВМРО (Об) и во неа се набележани нејзините задачи. Во неа стои дека „владејачките нации на трите империјалистички држави што ја поделија Македонија своето национално угнетување го образложуваат со негирањето на националните карактеристики на македонскиот народ, со негирањето на постоењето на македонската нација“. Притоа посебно се нагласува дека бугарскиот шовинизам, користејќи ја блискоста на македонскиот со бугарскиот јазик, ги прогласува Македонците за Бугари и со тоа го оправдува режимот на окупацијата на Пиринскиот дел на Македонија и на својата грабачка политика во однос на цела Македонија. Коминтерната притоа ги набележува задачите на ВМРО (Об), која е „должна да ја разобличува вистинската смисла на сите умувања, кои на Македонците им го негираат карактерот на нација“.
Сосема е јасно дека препораката на КИ, ВМРО (Об) во својата пропаганда „секојдневно да ја организира и раководи борбата..., на правото на македонските маси да се служат со својот мајчин јазик во сите владини и општествени установи, за слободата да учат на него и да издаваат книги“, не значела признавање на македонскиот национален идентитет. „Тоа просто било политичка инфузија на даден близок политички субјект со која можел да ги зајакне своите позиции“, заклучува академик Иван Катарџиев.
