Од аспект на забава, не гледам зошто не би постоеле забавни паркови, и зошто истите би се „фрлале во заборав“. И истите се далеку од фрлени во заборав - спротивно на примерот наведен во првиот пост, ќе го земам примерот со Парискиот Дизниленд, за кој малку поопширно би дискутирал од техничка гледна точка. Значи, документациони фотографии од еден напуштен забавен парк не се релевантни примери за генерализирање по истата тема. Да, комплетно се согласувам дека треба да се обновуваат, да се врши (а верувајте дека се врши) редовно сервисирање и безбедносна контрола, како и еден неспомнат детал - просторно (покрај административно) јасно одделување на точките дозволени за деца, и оние кои се дозволени само за возрасни, а кои претставуваат уште поголема атракција.
Во инженерството, големите забавни паркови претставуваат технички пар екселанс изведени дела, затоа што (зборувам генерално за деловите дозволени само за возрасни) таму се решаваат најтешките технички проблеми - оние поврзани со механичката физика, наука која, и покрај нејзината старост, е една од оние кои проучуваат дел од природата во која се опфатени најопасните и најголемите природни сили. Сето тоа, повторно до перфекција е искомбинирано и со психолошкиот поглед на еден просечен посетител, неговото прифаќање на тој простор, и емотивната слика која му се создава од истиот. Да не зборувам уште и за автоматизираноста на сите комплексни делови, и за целокупниот компјутерски daily maintenance кој се извршува.
Дизајнирањето на таквите забавни паркови, вклучува професионалци од многу области, големи материјални инвестиции за изградба, одржување и контрола. Материјални средства кои многукратно се враќаат кај инвеститорот, од големиот број на посети. Според тоа, може да се заклучи дека тие не се станати здодевни, туку напротив, им даваат моменти за забава на голем број на луѓе, од различни генерации. За жал се сложувам дека нашиот минимален „Луна парк“ е застарен и дека треба да се обнови (не да се затвори, секако). Дали застареноста е од дефицит на материјални средства, или дефицит на интерес кај одговорните, не сум компетентен да коментирам.
Процедурално: го менувам насловот на темата во „Забавни паркови - кај нас, и во светот“, бидејќи мислам дека не е доволно релевантна тема за да се споредуваме „Колку сме различни од светот“.
