По речиси три години наговарање на корисниците од XP да преминат на Vista, Microsoft одлучи да издаде нова верзија од својот оперативен систем. Windows 7 денеска ќе го добие своето официјално претставување, истовремено кога започнува и продажбата на новиот OS. Станува збор за голема надградба на Windows после Vista-та, која на пазарот се појави во јануари 2007-та година. За разлика од тешката Vista, која им создаваше главоболки на сопствениците на „побавни“ компјутери, Windows 7 оперативниот систем би требало без проблем да работи на сите компјутери, без разлика дали се поевтини или поскапи, со послаби или посилни карактеристики. Тоа е навистина значаен напредок, имајќи предвид дека повеќето корисници кои сакаат да преминат од XP OS на Vista пред тоа мораа да купат нов компјутер или некој негов дел. Во споредба со Vista, Windows 7 работи многу побрзо, системот се подига за само неколку секунди, а побрзо е и спојувањето со безжичната Wi-Fi мрежа. Олеснато е и пребарувањето датотеки на компјутерот, резултатите се појавуваат побрзо и се групирани во категории кои го олеснуваат пребарувањето. Microsoft ги предупреди корисниците дека во првите неколку недели може да дојде до проблеми во функционирањето на системот имајќи предвид дека сè уште не се решени сите багови, а потребно е да се изработат и прилагодат уште некои driver-и. Новите Windows изданија добија многу добри оцени од корисниците кои го инсталираа оперативниот систем во пробниот период, а со нивните оцени се согласија и експертите. Сите тие се согласуваат дека Vista-та треба да се замени со многу подобрата и побрзата „седмица“. Оперативниот систем Microsoft Windows и понатаму држи 90 отсто од пазарот, а компанијата тврди дека нејзиниот OS го користат повеќе од милијарда луѓе ширум светот. Без разлика на големиот удел, Microsoft стана мета на критики поради лошо прифатената Vista, а Европската комисија и американскиот Депратмент за правосудство го обвинија Microsoft за монополско однесување Во врат на Microsoft му дишат и главните конкуренти, Apple и Linux, односно Ubuntu кој ужива голема популарност кај корисниците кои сакаат да користат бесплатен оперативен систем и софтвер. Од овие причини новите Windows изданија мораа да бидат подобри од оние на Vista и поради кои Microsoft сите сили ги насочи кон развој на оперативен систем кој на корисниците ќе им овозможи полесно и подобро користење. - Windows 7 е се што Vista-та требаше да биде, па дури и повеќе од тоа, изјави директорот на компанијата AMD, додека Алекс Грузен од Dell новите Windows изданија ги нарече „револуционерни“. Без разлика на сјајните критики, сите се согласни дека во последните неколку години се развија бројни бесплатни оперативни системи и програми кои на корисниците им нудат квалитет и што е најважно, алтернатива. Тоа сигурно ќе го намали уделот на Windows на пазарот и за некое време ќе биде начната доминацијата на овој оперативен систем.
