Денот на Армијата на Македонија (АРМ) - 18 август, денеска свечено ќе биде одбележан со низа пригодни манифестации.
Централната свеченост ќе се одржи претпладнево пред зградата на Министерството за одбрана и Генералштабот (ГШ) на АРМ во присуство на државниот и армискиот врв, владини претставници, пратеници и на дипломатскиот кор во земјата.
Пригоден говор на свеченоста по повод Денот на АРМ треба да има претседателот на државата и врховен командант на вооружените сили Бранко Црвенковски.
На свеченоста е предвидена и церемонија на пензионирање и унапредување на генерали на АРМ.
По завршувањето на свеченоста од касарната „Илинден“ во чест на Денот на АРМ ќе се изврши почесна стрелба со испалување на десет плутони од 12 артилериски орудија.
По повод Денот на АРМ, делегација на ГШ, предводена од началникот, генерал – мајор Мирослав Стојановски, претпладнево ќе положи венци со свежо цвеќе на партизанските гробишта, на гробот на загинатиот претседател Борис Трајковски, како и на гробот на генералот Михаило Апостолски.
Церемонијата на полагање на венци со свежо цвеќе по повод Денот на АРМ, на градските гробишта во Бутел ќе биде организирана со воени почести, а се очекува свежо цвеќе да положат и делегации на: кабинетот на Претседателот на Македонија, Министерството за одбрана, Владата, Собранието, поранешниот претседател Киро Глигоров, Сојузот на борците од НОВ, Сојузот на резервните воени старешини и други.
извор