Американскиот компјутерски гигант Хјулит Пакард (Hewlett-Packard) најави дека планира да го затвори своето претпријатие во Германија до крајот на октомври, како дел од повеќегодишниот план за реструктуирање, објави Ројтерс. Компанијата посочи дека ја затвора фабриката југозападно од Франкфурт и додаде дека ќе бидат отпуштени околу 850 вработени. Останатите 250 вработени ќе можат да се преместат на работа кај нејзините партнери или клиенти. Реструктуирањето на услужниот бизнис нема да влијае на другите големи фабрики во Германија, истакнаа од Хјулит Пакард. На тој начин бројот на вработените на компанијата во најголемата европска економија останува на околу 10.000. Минатата година од компјутерскиот гигант најавија дека планираат да отпуштат 29 000 луѓе во текот на следните 2 години, за да успеат да го вратат растот. За компанијата работат над 300 000 луѓе од целиот свет.