КОМЕТАЛ ЃОРЧЕ ПЕТРОВ
Со Рајхел, но без Партјанко во тимот
Оксана Рајхел својот прв вистински меч оваа сезона би требало да го одигра во финалето на Лигата на шампионите против Слагелсе, што се игра в сабота во Копенхаген. Таа неодамна, конечно, се врати во тимот на ѓорчепетровки по операцијата на коленото на која мораше да биде подложена по повредата што ја заработи бранејќи ги боите на Украина на Олимписките игри во Атина. Рајхел веќе одигра неколку натпревари во Суперлигата, но првиот финален меч од ЛШ ќе биде вистински тест за нејзината подготвеност. Лекарскиот тим на нашиот шампион уште пред еден месец и даде зелено светло за настап, но тренерот Андреј Портној не сакаше да ризикува поради нејзината недоволна физичка подготвеност.
Тамам кога Портној си помисли дека екипата му е комплетирана, се случи повредата на Јулија Партјанко. Младата Украинка со македонски пасош го повреди коленото на неодамнешниот првенствен натпревар со Кале Кичево и за Данска ќе патува само како гледач.
Ѓорчепетровки изминативе две дена ги имаа последните тестови пред патот за Данска в петок. Во СРЦ "Кале" им спарингуваше прволигашот од СиЦГ, Хумел од Белград, при што беа забележани две лесни победи (34:15, 30:19). Портној го играше првиот меч со ракометарките кои конкурираат за место во првиот тим, додека на втората средба шанса добија главно младите ѓорчепетровки од Еуростандард.
Јелиз Озел, која пред две недели беше оперирана, покажа дека без проблеми може да игра и во нападот и во одбраната, иако настапи само во првите 30 минути од првиот меч. Оперираното колено на Рајхел се уште е "дебело" бандажирано, но не и се забележуваа проблеми во трчањето.
***
Ламинатот денеска ќе биде сефтосан
Кометал Ѓорче Петров и Олимпик Аеродром денеска ќе ја сефтосаат новата подлога што на инсистирање на ЕХФ мораше да биде монтирана врз паркетот во СРЦ "Кале" за потребите на реваншот од финалето на ЛШ. Поставувањето на ламинатот, кој беше донесен од Олборг (Данска), беше извршено синоќа и на тој начин барем делумно беа покриени недостатоците во салата која во моментов изгледа како вистинска кочина. Трибините како со години да не виделе вода, а паркетот веќе не ги ни исполнува условите за одигрување на голем меѓународен меч, за што од Кометал ЃП ја обвинуваат најновата мода во СРЦ "Кале" да се организираат концерти и журки.
ВИП-ложата ќе бидат проширена со дополнителни 220 столчиња, откако од ЕХФ биле побарани 60 билети.
***
Портној го продолжи договорот
Управата на ѓорчепетровки ја прекрши досегашната пракса да отпушта тренери кои му носат големи трофеи и реши да го продолжи договорот со Андреј Портној. Украинскиот стратег дојде во клубот пред две сезони, а со новиот договор неговиот престој во Скопје е продолжен за уште две години. Условите не се соопштени, но, според челниците на клубот, тие не отскокнувале многу од досегашните. Кометал ЃП на тој начин го претрка Хипо кој сериозно се заканувал да му го преземе Портној.
Александар Панов замина веднаш откако на клубот му го донесе првиот трофеј во ЛШ, а неговиот наследник Леонид Евтушенко беше отпуштен само еден ден по триумфот во европскиот Суперкуп.
***
Шампионот добива 80.000 евра
Доколку триумфира во ЛШ, во касата на Кометал ЃП ќе се слеат 80.000 евра, колку што изнесува наградниот фонд на ЕХФ за новиот европски првак. Самиот пласман во финалето носи премија од 30.000 евра, додека европската титула чини дополнителни 50.000.
Од друга страна, клубот, освен парични, засега не планира посебни премии за своите ракометарки во случај на триумфот.