Ичелиќ: Да броиме победи кои се „официјални“!
Во секој случај, добро е што бележиме победи во овој период на подготовките. Но, за мене е многу поважно да бидеме добри и да победуваме кога тоа ќе дава бодови“- вели српскиот стручњак и еден од многуте нови ликови во клубот од Гевгелија.
Осум контролни средби и шеста победа. Веројатно и најважна, макар и во пријателски натпревар е онаа на Кожув против екипата на МЗТ Скопје. Иако тесна, а според првиот тренер на гевгеличани, извојувана со доста грешки, сепак, е доста важна за тимот, за клубот кој влегува со уште поголеми амбиции во однос на претходните сезони.
Секако, прво на радост на стручниот тим, секако и оној играчкиот. Но, како и да е, Марко Ичелиќ, кој оваа сезона ќе ги води гевгелиските „црвено-бели“, има причини да биде задоволен.
„Искрено кажано, драго ми е што победивме, но јас не гледам во делот во кој се бројат победите туку многу повеќе како сме стигнале до тие успеси. Не бевме толку добри како што кажува резултатот. Доста грешевме и сигурно е дека тука има уште што да се поправи во наредните денови кои се пред нас“ - вели младиот стручњак на кормилото на Кожув само ден откако го совладаа и МЗТ Скопје (77:74) во еден контролен меч, кој за српскиот тренер и не значи премногу, секако, од резултатски аспект.
„Добро е да броиме победи, но уште подобро и, секако, поважно е да броиме победи кои се водат како официјални. Во суштина ова не значи ништо, освен продолжението на серијата успешни резултати во периодот на подготовките. Свесен сум и јас дека сето ова во Гевгелија е доста ново. Нов тим, нов тренер за кој има голем простор за напредување, и на кои им треба време да го поставиме она што го замислуваме и се обидуваме да го направиме за време на тренинзите. Реално, добро држиме во одбрана, која во овој момент функционира подобро во однос на нападот, но и тоа е разбирливо, има многу нови играчи кои треба да се вклопат во офанзивниот систем. Затоа и играме голем број вакви натпревари низ кои ја бараме играта која сакаме да ја поставиме во сезоната која е пред нас“- дополнува Ичелиќ.
http://www.sport.com.mk/default.asp?ItemID=4B4FBA3C280101409AF71B6901DFE868