На ден пред нас да ни почне сезоната, да си напишам јас традиционалната анализа.
Ќе почнам со Лампард. Пишував доста по крајот на минатата сезона дека не сум сигурен дали сега е вистинско време он да не менаџира, дека можеби е прерано и дека не би сакал да видам како не успева и го напушта Челзи. Ама после објавата ги отфрлив тие работи затоа што не сум некој кој се фокусира на негативното, туку секогаш барам позитиви. Многу пати пишав, па еве уште еднаш, уште ми делува нереално дека можеби најголемата клубска легента ни е тренер. Верувам кај секој од нас има некоја возбуда за сезонава, иако очекувањата ни се можеби најниски до сега откако го следиме клубот. Има позитивни знаци кај Лампард, покажа дека е спремен да се адаптира и да испробува различни формации, а и справувањето со ситуацијата со Луиз е за поздрав. Останува да видиме дали конечно ќе се прекине таа моќ на играчите во Челзи.
Трансфери
Може имавме трансфер бан, но сепак го имаме Пулишич како нов играч, а би сакал да го спомнам и Ковачич, како и играчите кои ни се враќаат од позајмица и ќе бидат со првиот тим оваа сезона.
Пулишич - откако го објавија трансферот изгледав неколку документарци кои ги најдов за него и прво нешто што ме импресионираше беше колку зрело делува на само 20 години. Иако е ептен млад, веќе има доста искуство. На припремиве добро се покажа според мене. Не е фер да го гледаме како директна замена за Хазард, но очекувам добра сезона од него и мислам дека ќе станува се подобар понатаму.
Ковачич - воопшто не бев за негов перманентен трансфер, ама импресионираше на припремите во поразлична позиција. Лани играше како најофанзивен играч од средина, а како што знаеме во напад ич не го бива. Ама поповлечено изгледа како скроз различен играч и ми дава надеж дека доста ќе ни помогне сезонава.
Е сега играчите од кои многу се очекува, оние кои ни се враќаат од позајмици.
Рис Џејмс - наскоро се враќа од повреда и едвај чекам да го видам. Азпи колку и да ни беше константен низ годиниве, сепак вака како бек не е баш опасен во офанзива, а детево е страшен талент и сигурен сум дека ако си ја искористи шансата би можел до крај на сезона целосно да го замени Азпи. За него најмногу се надевам дека не грешам.
Курт Зума - ептен сум среќен што конечно ни се враќа и он. Се надевам дека ќе продолжи таму каде што застана со Челзи пред повредата. Сега со трансферот на Луиз загарантирано е дека ќе се изнаигра сезонава и едвај чекам да видам како ќе се покаже пак во Челзи.
Мејсон Маунт - после добрата сезона под Лампард во Дерби, на припремиве покажа за каков талент станува збор. Можеби ќе му треба малце време додека да се истакне во ПЛ, ама би требало доста да помогне додека да се врати Лофтус. Неговото присуство одлично делува и на Баркли, интересна ќе биде конкуренцијата меѓу нив.
Мичи Батшуаи - ова мислам дека ќе му биде последната шанса во Челзи. Ќе видиме што ќе направи, немам некои посебни очекувања. Неспорно е тоа дека е добар финишер. Во првата сезона доста ни помогна од клупа и даваше доста голови така. Можеби таква улога повеќе му одговара. Се надевам ќе изненади.
Тами Абрахам - цело време за него пишувам дека нешто ми фали. Дека не сум сигурен дека ќе го достигне нивото кое е потребно за Челзи. Лани имаше импресивна сезона за Вила, па еве му шанса да се докаже. Мислам дека Лампард ја почнува сезонава со него како прв избор. Дали конечно ќе ни го реши проблемот со напаѓачите, останува да видиме.
Кенеди/Бакајоко - овие двајца можно е и да си одат до крајот на месецов. За Бакајоко се надевам дека тоа е случајот, а Кенеди може и да остане, па да добие и он една последна шанса, да видиме дали ќе биде нешто од него.
Тимот
Вака на хартија покриени сме на секоја позиција. Формацијата ќе се мења, па ги ставив во 4-3-3 ама не прави некоја разлика тоа. Доколку си оди Бакајоко, за Канте ќе покрива Ковачич, а секако може и Баркли, па и Лофтус. Доста подмладен тим сезонава, но тоа е тоа што го сакавме со години веќе. Потребни се добри сезони од Кристенсен, Жоржињо, па и Жиру да помогне со искуството. Најбитно е Лофтус и Одои да се вратат исти како што беа и брзо да фатат форма затоа што при крајот на сезоната веќе беа сигурни стартери.
Очекувања
Како што пишав горе, верувам сите имаме прилично ниски очекувања за сезонава. Реалноста е дека ќе бидеме 5ти или 6ти. Но, се може да се случи. Може да тргнат наопаку работите, па да испадне лоша сезона, а може и да изненадат па некако да се пикнат во борбата за топ 4. Најмногу зависи од тоа како ќе се покажат младинците. Конечно имаат вистинска шанса да го исполнат потенцијалот и да се докажат во Челзи. За доброто на сите нас, се надевам дека целиот хајп ќе испадне оправдан.
Во куповите секогаш може се да се случи, би сакал бар во еден да одиме до крај. А за ЛШ не знам што да очекувам, и таму ништо не се знае. За почеток доволно е да излеземе од група, па понатаму ќе видиме, до тогаш ќе имаме и многу подобра слика за што да очекуваме.