ХРВАТСКИОТ ШАМПИОН БАРА НАСЛЕДНИК ЗА СВОЈОТ БИСЕР, МОЖНО Е ТОА ДА БИДЕ НАЈДОБРИОТ ФУДБАЛЕР ВО НАШАТА ЛИГА
Неџипи го менува Модриќ во Динамо!?
* Искусниот струњак Ото Бариќ за хрватските медиуми посочил дека наследникот на Лука Модриќ би требало да биде Неџипи. Познато е дека тој е живо заинтересиран да го види Неџипи во дресот на албанската селекција која тој ја предводи
Ндерим Неџипи (22) е можниот наследник на Лука Модриќ во дресот на најдобриот хрватски клуб и актуелен шампион и учесник во Лигата на УЕФА, Динамо Загреб. Имено, познато е дека членот на "модрите" и стандардниот хрватски репрезентативец оваа зима, најверојатно, заедно со раководството на загрепчани ќе прифатат една од големиот број понуди од најголемите европски клубови. Најчесто се споменуваше Баерн Минхен, како и голем број премиерлигаши. Неофицијално неговата цена изнесува нешто повеќе од 10.000.000 евра. А познато е дека првиот човек на Динамо, Здравко Мамиќ, знае како се работат големи трансфери.
И каде е тука Неџипи? Пред неколку дена во интервју за хрватските медиуми искусниот стручњак Ото Бариќ (екс селектор на "коцкастите" кој не ја крие својата амбиција да стане тренер на Динамо) истакнал дека наследникот на Модриќ би требало да биде нашиот најдобар фудбалер во Првата лига, Ндерим Неџипи. Негово образложение е дека тој подолго време ги следел настапите на Неџипи и дека станува збор за екстра талентиран и квалитетен фудбалер, воедно и релативно млад. И тој смета сека Динамо Загреб нема воопшто да погреши ако го доведе.
Инаку, во контекст на ова позната е нетрпеливоста на Катанец кон Неџипи па затоа Бариќ веќе подолго време бара од Албанската фудбалска федерација (актуелен селектор на Албанија е токму Бариќ) да направи с$ Ндерим да го понесе дресот на оваа земја.
А познато е дека мислењето на Бариќ се цени во Хрватска. Па затоа можеби и од таму "тревогата" кај тамошните новинари кои веќе го исконтактирале Неџипи и побарале мислење од него за Динамо Загреб, за евентуалниот трансфер и општо за хрватскиот фудбал. За тоа како тој би се снашол во тимот на Бранко Иванковиќ, како би соработувал со Манџукиќ, Шокота, Балабан, Самир, Вукојевиќ и останатите ѕвезди на "модрите".
Сега на потег се Динамо Загреб, самиот Неџипи и се разбира Работнички К. Дали по Слога Ј, Херта, Волвсбург, Вардар и Работнички К следната станица ќе биде Динамо.
И дали Неџипи ќе биде уште еден Македонец кој ќе го понесе модриот дрес на балканскиот фудбалски гигант по Васил Рингов, Гоце Седлоски и Сашко Пандев?
З. Ѓоршоски
НДЕРИМ НЕЏИПИ:
Се јавуваат новинари од Загреб
"Искрено не знам за што станува збор, но овие два дена ми се јавија неколку хрватски новинари од Загреб да ме прашаат дали има желба кај мене и дали е можен ваков трансфер. Им одговорив дека немам ништо против да играм во дресот на 'модрите'", ни изјави вчера Неџипи потврдувајќи го хрватскиот медиумски интерес за неговите услуги.
Белгија останува сигурна опција
Корејскиот Поханг, потоа украинскиот Дњипро беа многу блиску во оваа година на изминување да го доведат Неџипи. Но високата отштета, односно недоговарањето на личните услови беа пречката најдобриот фудбалер на Работнички К да си замине. Во последно време актуелна е понудата од еден од најдобрите белгиски клубови. Можно е уште сега во ноември да се заврши трансферот, а потоа Неџипи во јануари да замине.
Работнички К мора сега да го продаде
Велиме Работнички К, односно потпретседателот Коста Костовски мора сега да го продаде својот најдобар фудбалер од следните причини:
Неџипи игра во голема форма, актуелен е низ трансфер маркетот во Европа. Овој зимски преоден рок веројатно ќе ја достигне најголемата цена, одигра феноменално со Болтон и што е најважно Работнички К само ќе загуби ако сега не го продаде, тука мислиме од финансиски аспект. Зошто искрено Костовски и без услугите на овој фудбалер има таков тим без проблем да ја освои титулата па и Купот. Во случај тоа да не се случи тогаш ќе го има напролет недоволно мотивираниот Неџипи, кој е фудбалер само за големи мечеви.
