„Црвен картон“ за расизмот и национализмот на стадионите низ Македонија
21.10.2010 - 15:14 | Фудбал
Натпреварите од следното 11.коло од Првата фудбалска лига кои викендов треба да се одиграат на стадионите низ Македонија ќе започнат со покажување „црвен картон“ од страна на играчите и судиите поради појавата на расизам и национализам на стадионите и спортските објекти воопшто.
Сите капитени на прволигашките екипи ќе носат капитенски ленти на кои ќе стои пораката „Обединети против расизмот“, порака каква што ја носат капитените во сите фудбалски првенства во Европа во рамките на „Неделата на акција против расизмот и дискриминацијата во европскиот фудбал“ која трае од 14 до 26 октомври.
Предвидено е и изнесување на транспаренти со кои ќе се побара запирање на насилството на фудбалските натпревари и спортот.
Официјалната порака за борбата против насилствата на спортските терени ќе биде испратена од Штип каде на првенствениот натпревар Брегалница - Скопје ќе бидат присутни официјални лица од Фудбалската федерација на Македонија и од ФАРЕ организацијата која има улога на главен координатор на сите организации кои ја поддржуваат ова акција.
ФАРЕ претставува мрежа од невладини организации со главна цел борба против расизмот и национализмот и дискриминацијата во спортот.
- Спортот освен спортската функција има и сериозна општествена функција. Во изминатиот период бевме сведоци на неколку инциденти, а еден од нив беше и вадењето на македонското знаме од јарболот на еден фудбалски натпревар во Кичево. Тоа се случуваше точно во времетраењето на неделата против расизмот и насилствата на спортските терени во Европа. Ние како дел од Европа се вклучуваме во оваа акција и веруваме дека ќе дадеме свој допринос во искоренувањето на овие појави од спортските терени, истакна на денешната прес-конференција претставникот на ФАРЕ за Македонија, Нелко Нелковски.
За идните активности на ФАРЕ, Нелковски го најави поектот „Ден на спортот“ сличен на кампањата „Ден на дрвото“. За овој проект тој истакна дека добил поддршка од претседателот на државата, ФФМ, Македонскиот олимписки комитет и од многу други институции.
ФФМ во континуитет поддржува активности против девијантното однесување на спортските терени.
- Отворени сма за соработка со сите кои се подоготвени да помогнат во борбата против ова зло на фудбалските терени. Кај нас најголемите девијантни појави се случуваат на фудбалските терени и се изразени како национализам, додека на расизмот се уште сме имуни. Национализмот е сериозен момент кој може да ги наруши односите меѓу етникумите кои живеат во Македонија и затоа мора што порано да се искорени, рече Иван Анастасовски, член на претседателството на Фудбалската федерација на Македонија.
Акцијата на ФАРЕ ја поддржаа многу невладини организации и тие за време на претстојниот викенд ќе имаат низа активности со што ќе дадат свој придонес во одбележувањето на „Неделата на акција против расизмот и дискриминацијата во фудбалот во Европа“.