Убавини имаме, немаме „кликер“ за туризам
За изградба на инфраструктура на Пониква, општината очекува поддршка од државата, вели градоначалникот на Кочани, Ратко Димитровски
Имаме исти планини, речиси исти природни убавини со Пиринска Македонија, но од другата страна на границата Бугарите изградија многу суперлуксузни хотели, современи туристички комплекси што се познати во Европа и се полни со туристи и лете и зиме. Кај нас ништо, освен по неколку хотелчиња и мотелчиња во Малеш и на Осогово и алтернативен туризам во повои.
Вака деновиве во „Пониква“, единствениот поголем туристички комплекс на Осоговските Планини од македонска страна, коментираа наши туристи и вљубеници во планините. Сретнавме и помала група бугарски туристи и планинари кои беа изненадени колку малку е вложено за развој на туризмот во овој убав планински предел. Комплексот „Пониква“ е на надморска височина од околу 1.500 метри, а од Кочани е оддалечен дваесетина километри. Има три ски-лифта со што „Пониква“ е единствено место од левата страна на Вардар каде што има услови за скијање. Освен викендичките, некои од нив изградени на несоодветни места и го нарушуваат природниот амбиент, во комплексот има само неколку комерцијални објекти - Детското одморалиште, кое го доби и го реновираше МВР и сега е од полуотворен тип, еден ресторан, еден мотел со 45 и еден мотел со 20 легла.
- Македонија е божја земја. Господ овде дал се', изобилство од природни убавини - шуми, пасишта, бистри води, прекрасни пејзажи. Но, инфраструктурата е на многу ниско ниво. Овој крај државата како да го заборави. А, за да се види како се развива туризам и како од него се земаат големи пари не треба да се оди многу далеку. Доволно е само да се помине границата и да се видат Боровец, Банско, Сандански ... - вели Сашко Стефановски, секретар на планинарското друштво „Осогово“ од Кочани.
Во помалиот мотел „Кај Мице“ разговаравме со сопственикот, кочанецот Никола Христов-Мице, долгогодишен планинар, алпинист, спасител, а сега и угостител. Мотелот, кој има осум соби, ресторан со 80 стола и летна бавча во прекрасен шумски амбиент, некогаш бил сопственост на кочански „Југотутун“, во кој Мице работел. Откако објектот почнал да пропаѓа, во 1993 година го зел под кирија, а во 2000 година, како единствен заинтересиран, го купил под поволни услови. Сега со сопругата живее во него.
- Бизнисот го почнав со литар ракија, гајба сок и гајба пиво. И сега е тешко, одвај се вади за живеачка, но барем сум свој на свое. Туристите се обидувам да ги привлекувам со ниски цени. Ноќевањето е 300 денари. Евтина е и храната, а на менито постојано имаме традиционални специјалитети. Поради разни проблеми има малку туристи, освен месец-два зиме. Нема организирани тури, па често самоиницијативно ја разбиваме монотонијата. Јас, на пример, имам санки и четири кучиња хаски. Бидејќи мотелот е оддалечен 400 метри од асфалтираниот пат, во зимската сезона багажот на гостите до мотелот го носам со санки. Повеќе туркам јас отколку што влечат хаските, но тоа е многу атрактивно за туристите - објаснува Мице. Тој истакнува дека, освен подобрувањето на инфраструктурата и на хигиената, неопходна е поголема промоција на убавината на овој крај во странство. Градоначалникот на Кочани, Ратко Димитровски, има викендичка во близина на комплексот и често е на Пониква.
- Осогово ни дало големо богатство и одлични услови за развој на туризмот. Пониква ги има сите услови да стане современ туристички центар. Главен проблем е инфраструктурата. Струјата е решена, треба да се заврши водоводот, да се изградат ски-лифтови, бијатлон-патеки, нови комерцијални објекти. Како општина, не сме доволно финансиски моќни, па очекуваме поддршка од државата, а ќе го развиваме и јавното приватно партнерство. Министерството за одбрана ни отстапи повеќе објекти на Пониква, па работиме на уредување и на адаптација на повеќето од нив - вели Димитровски.
Љупчо Шатевски
Извор:Дневник
Уште колку вакви статии ќе читаме....:nenene:
