ПРОЧКА, ВЕЛИКИ ПОКЛАДИ
(Недела на проштевањето)
"ПРОСТЕТЕ МИ ДА ВИ ПРОСТАМ АКО СУМ ВИ ГРЕШЕЛ НЕШТО"
Господ Исус Христос рекол: „...Кога пристапуваш кон жртвеникот и се сетиш дека имаш нешто против братот свој, или тој кон тебе, тогаш оди, помири се со него а потоа со чиста совест пристапи...“
Дури и какви духовни и телесни подвизи да сме направиле, не не чинат достојни за заедница со Бога, ако живееме со омраза, непријателство и непомирливост со ближниот.
Мирот во нашите души доаѓа само тогаш кога имаме мир со Бога, кој е пак условен и единствено остварлив само преку мирот со ближните. Тој е единствениот пат за мир, радост и спокој на нашите души и нема друг пат освен него. Навистина, многу "болен" за нас заради кршењето на себељубието и гордоста, но само тој пат води низ тесната врата кон Царството Небесно.
Затоа, Прочка е ден на помирување на небото со земјата и ден кога сите духовно се "причестуваме".
Прочка не треба да ни биде само еднаш годишно или секој почесен ден од четирите големи постови, туку наша насушна секојдневна потреба.
Овој празник пред Чесниот пост е устроен за да потсети на духовниот карактер на постот. Му се посветува на проштевањето или посуштински на покајанието, кое во Црквата претставува единствената вистинска содржина на личносните односи. Телесното воздржување што се практикува за време на постот е неразделно од богокопнежливата љубов на христијаните. Таа самата подразбира тежнеење да се живее во добродетелите на милостивост, кротост, долготрпеливост, смирение и секое човекољубие. Верните настојуваат ревнувајќи во овие добродетели и особено преку подвигот на Исусовата молитва, да Му приготват во себе живеалиште на Светиот Дух.
Нека ни прости Господ Бог наш Исус Христос, а и да си простиме сите ние и да се помириме.
Зашто, мирот нема цена
