Многу работи имаат влијаено и влијаат кај постарите генерации држење на чекор со времето и развитокот на технологијата.
Менталитетот на самиот народ извајан во текот на историјата. Прво овие простори се упропастени од страна на Османлиите, па после доотепани низ Балкански војни, па кој стигнал ги изгазил и во двете светски, за потоа како така да функционират во федерацијата. Голем дел од мрзливите навики се влечат од овој последниот период и никаква амбиција за напредок.
Менталитетот на Медитеранот, т.е еве забележете ги сите народи кои имаат добиено скоро се од природата се флегма во споредба со оние кои немаат ништо, особено медитеранскиве.
Менталитетот на Балканот, скоро сите сме како од еден калап извадени, оди во Германија само да го погледнеш на улица и без да ти зборни ќе знаеш дека е од тука. Курчење, шалабајзерство, сељачизам, јадење трици и тоа што треба и тоа што не треба, кривинаши за работа, експерти за се.
Јазичната бариера. Во почетоците Македонска поддршка немаше, а голем дел од населението не знае ни Hi да каже на Англиски. За жал тука пинг понг и со ориентацијата, имаат осакатено многу од овие генерации со: „ај да не го бркаме професорот по Француски, децата ќе учат Француски„ (ова во случајот кај мајка ми било), дел учеле Руски (од Русија не сме добиле ништо ниту ќе добиеме, ама битно осакатени генерации да го учат нивниот јазик). Англиски веќе генерации родени после 77-80 по неколку класови, па поинтензивно од 85та наваму.
Катастрофално образование. Образовниот систем ни е катастрофа, за жал познавам луѓе под 30 години кои не знаат ни леб да си побараат на англиски, а што е потрагично се дибидус и во поглед на останатите области. Сум начекал инженери да не знаат двојна дропка, квадратна равенка, питагорова теорема и да не набројувам. Најголема грешка беше воведување на задолжително средно, второ укинување на приемни испити на факултет, трето форсирањето да не повторуваат година. Никакви критериуми немаме ниту за студентите ниту за образовните лица, непотизам, корупција и мито на секој чекор (од чистачка во образовна институција, па се до директор/декан/ректор).
Областа во која се наоѓа. За учење на технологија треба и време, особено да се сретнуваш со тоа постојано. Ако си земјоделец и лупаш со тракторот или копачот од утро до мрак, на крај од денот максимум што ќе ти се гледа е храната, тушот и креветот. Иако напредок би се сметало и во неговата област да ги следи иновациите, само за жал кај нас обично едвај успеваат да купат Тохе/Шторе/Фергусон од 70та, а не пак да купуваат механизација со вграден компјутер.
Сиромаштијата на овие простори. Да бидеме искрени, за технологија и образование требаат пари. Голем дел од народот во државава сеуште живее на посебна салама и паштета од 7 денари, да не се лажиме дека сите имаат кеш да трошат пари на технологија. Оваа држава мина низ транзиција, стечаи, технолошки вишок, огромна невработеност и пљачкање. Да имаше барем еден понормален на кормилото имаше услов се што е троа побистро да се преквалификува и денес да бидеме 100 чекори понапред. Јас живеам со логиката, не му ја фаќај рибата, туку научи го да ја фати, така ќе јади и тој, а ќе има да те почасти и тебе. За жал државата тука не ги учеше туку ги рекетираше.
Незаинтересираност на самиот човек. Е ова е најголемиот фактор, спој на тие фактори од погоре доведе да имаме ликови кои завршуваат било какво образование и си легнуваат на брашното до пензија. Навиките од СФРЈ за сигурна работа, редовна плата и работел не работел дневницата течи го догураа овој народ единствена амбиција да му биде фаќање кривина. Дополнително придонесоа партиските книшки, а рака на срце и тешки мрзи сме како народ, се што имаме ни е земено здраво за готово (дури и државата ја изгубивме со овој менталитет).
Младите не значи дека се пописмени, имаат среќа да растат со уредите од раѓање и можеби ќе знаат да ги баратаат повеќе, но прашањето е во за што ќе ги користат. Ако ги користат само за гејминг и социјални мрежи, тури му пепел.
За жал и кога пробуваш да им наметнеш нешто има огромен отпор, а глупите ги слушаат поглупите и тешко дека брзо ќе напредуваме, барем јас сум скептик, се додека тие што ја диригираат целата приказна пробуваат своето незнаење да го прикријат со реформи кои само затупуваат ќе имаме заостанување.
