Гафот на Берлускони за Обама предизвика остри критики во Италија
Рим, 7 ноември (МИА) - За време на вчерашната посета на Москва италијанскиот премиер Силвио Берлускони испрати несекојдневен комплимент до новиот американски претседател Барак Обама дека е „млад, убав и исончан“, кој предизвика остри критики од страна на италијанската опозиција, коментира весникот „Кориере дела сера“.
Лидерот на Демократската партија, Валтер Велтрони побара од Берлускони веднаш да му се извини на Обама, сметајќи дека ваквиот коментар испратен на адреса на американскиот претседател негативно ќе влијае врз имиџот на Италија на меѓународна сцена.
Според центристичката партија „Италија на вредностите“, италијанскиот премиер паднал многу ниско со ваквиот комплимент кон Обама, додава весникот.
Веќе неколку пати досега Берлускони го демонстрира своето чувство за хумор. Овојпат неговите жртви не се традиционалните објекти, жените, сексот или комунистите, туку новиот американски претседател, пишува весникот „Република“.
Весникот „Стампа“ нагласува дека Берлускони ветил дека ќе им врачи награда „за најголем глупак“ на оние кои го критикуваат и со тоа покажуваат дека немаат чувство за хумор.
Неговата партија „Народ на слободата“ излезе во заштита на Берлускони, објаснувајќи дека шегата на премиерот е само хумористична забелешка, која би ја направил секој повозрасен човек кон својот помлад член од семејството, пишува „Стампа“.
(07.11.2008)