По што дечкото е од Прилеп и има 17 години мој предлог би му бил да заврши средно, најпрво. Претпоставувам дека е добар ученик па би можел да се запише на Економскиот факултет тука во Прилеп. Скоро сите влегуваат во државна квота. Одзивот на факултетот последниве години е мал, посебно откако се изнаотворија еден куп факултети, во секое село што се вели.
Не дека факултетот нуди некоја голема перспектива тука во државава но како одскочна даска за студентска работа во странство ти е супер опција. Државна квота ти е 200 евра. Ако си добар студент и навреме си полагаш испити во 2 година комотно можеш да си аплицираш за државна стипендија. За стипендијата за социјални категории критериум ти е мислам да немаш високи примања, и 90% или 80% од испитите од прва година да ти се положени. Износот на стипендијата ти е некаде околу 500 евра, таман да си ги покриеш трошоците за студирање. Ако си добар студент, со просек, можеш да си аплицираш и за повисока стипендија.
Секоја година можеш да си аплицираш за работа во Германија како студент, McDonald's е најзастапена опција. Верувам си чул до сега за тоа, ако не, верувај ќе дознаеш. Само биди редовен на предавања и шири го кругот на пријатели. Јас имам пријатели кои останаа во Германија и се стекнаа со работна виза. Ако се покажеш како добар работник газдите сами ќе те побараат, дури и ќе ти понудат работна виза за подолг престој. Ако се одлучиш за оваа опција ти советувам да си го усовршуваш германскиот посовреме. Швабите ценат кога го знаеш јазикот.
Факултетот исто ти нуди и опција за Америка во текот на летото. Само оваа варијанта ќе ти биде малку скапа заради патните трошоци до таму и назад.
Кога мислам на факултетот не велам дека факултетот е инволвиран во наоѓањето работа во САД, туку дека постојат агенции кои што посредуваат за работа благодарение на твојот статус на студент. Само биди редовен студент и гледај да ги земаш испитите на време.
Ако имаш некакви афинитети кон компјутери или електроника, генерално добра варијанта ти е да си се запишеш електро, машински или информатика. Во Битола ги имаш тие факултети, мислам. На универзитетот св. Климент Охридски да бидам поконкретен. Е сега ќе патуваш со автобус до таму, малку е малтретирање можеби. Ќе треба да вадиш месечна карта, мислам оти е некаде 3000 ден. не ме држи за збор.
Ова зборувам ако си сериозен за учење и навистина те влечат овие работи.
Додека студираш можеш и да си бараш и работа. Да го искомбинираш факултетот со работата. Можеби ќе ти биде понапорно но ако си направиш план и правилно го користиш времето тогаш секогаш ќе си имаш пари во џеб колку за тебе, што да не и да помогнеш нешто и за дома. Келнер на пример ти е добра варијанта како работа додека студираш.
Додека студираш ти самиот ќе си видиш што најмногу ти одговара. Ќе се мешаш со колеги на факултет и од нив ќе дознаваш разни работи и мислења, ќе ти се прошират видиците со други зборови. Само биди активен, комуницирај и дружи се.
Е сега, ако сепак не се одлучиш да се запишеш на факултет од работните места кои ти се достапни во Прилеп за работа се: Гентерм - Прилеп, Кромберт и Шуберт во Битола, Дрекселмаер во Кавадарци. Од прилепските фирми немаш баш голем избор освен Гентерм и во некоја текстилна компанија од типот на Комфи Ангел, да работиш како магационер. Утовар растовар, градежно, за дистрибутер ти треба возачка, да земеш занает за редење "кнауф" кај некој мајстор, молер, чирак кај некој механичар...тоа ти се опциите горе долу во глобала.
Не значи дека и да дипломираш нема да завршиш таму. Факултетската диплома како што е општо познато не гарантира работа во државава. Ако немаш пријатели и врски тешка работа. Прилеп е мизерија за млад човек, како и секој друг провинциски град во државава.
Сепак, факултетот ти отвора некоја си мала искра надеж, баш поради работите кои ти ги набројав погоре.
Ако ти треба веднаш работа, некој ја спомена "печуркарата". Сезонска работа е, се преработуваат печурки, малини, вишни...зависно од сезоната. Мислам дека нема потреба да си пријавен за да работиш таму, нема договори и такви работи. Барем од она што го имам слушнато. Најдобро е да си се распрашаш.
Како и да е, што и да одбереш од предложените варијанти со сигурност ќе ти биде подобра одлука од колку тоа да крадеш или да дилаш трефче. Кога тогаш ќе наебеш. Мудро бирај ги пријателите. Некогаш е подобро да си сам од колку со погрешни луѓе. Арамиите и дилерите во градов се знаат, исповрзани се со полиции и со се живо. Еве кај мене во маало нема куќа каде што немаат провалено. Кај мене дома дури три пати до сега па ни трага ни глас.
Такви ситни риби ко тебе шо крадат сокчиња од продавница наебуваат во државава, големите арамии седат во фотеља во влада.
Затоа бери ум, подалеку од овие работи. Седи учи, усовршувај се. Учи занает, учи јазик, дипломирај...летни му ја од тука ако ти се пружи прилика. Млад си, имаш опции, животот е пред тебе.