Еве го последниот бисер кој се надевам дека е само новинарска шпекулација, како и обично кај нас:
Скопје или Охрид, се градовите кои деновиве најчесто се споменуваат во комбинаториката околу прашањето каде фудбалската репрезентација на Македонија ќе го одигра првиот официјален меч во новата година против соодветниот состав на Србија. До одигрувањето на контролната средба остануваат уште петнаесетина дена, меѓутоа деновиве се интезивираат контактите меѓу двете фудбалски Федерации, на релација Скопје - Белград. Имено, челниците на фудбалскиот сојуз на Србија се живо заинтересирани каде ќе се одигра претстојната средба, бидејќи од Белград пристигаат најави дека српската фудбалска делегација на 6 февруари ќе биде навистина бројна. Од таа причина, првиот човек на ФСС, Звездан Терзиќ, планира неговата фудбалска експедиција со чартер лет да ја донесе во Македонија.
„За нас е многу важно мислењето на нашиот Стручен штаб. Се разбира дека посакуваме дебито во новата година да биде на стадион и терен кој ќе ги понуди најдобрите услови во овој период од годината, и барем засега во најтесниот круг на можни стадиони каде што ќе се одигра контролната средба со селекцијата на Србија, се оние во Скопје и Охрид“, ни изјави вчера првиот човек на ФФМ, Харалампие Хаџи-Ристески. Тој потврди дека веќе неколку пати разговарал со неговиот колега од Србија, и дека претстојниот дуел ќе се одигра само на стадион кој ќе ги овозможи најоптималните услови на 6 февруари. „Го задолжив техничкиот секретар на репрезентацијата, деновиве постојано да ги контактира луѓето кои ги следат временските прилики во земјава. Од нивната проценка и дадено мислење, во многу ќе зависи нашиот последен став во врска со прашањето каде ќе се одигра средбата. Градскиот стадион во Скопје нуди најдобри услови, меѓутоа не е лош ниту стадионот во Охрид, а згора на тоа во овој град има и аеродром така што гостите релативно лесно ќе можат да пристигнат и да си заминат од нашата земја“, ни потврди Хаџи-Ристески.
Инаку, селекторот Среќко Катанец утре ќе допатува во Македонија. По консултациите со неговите соработници најверојатно веќе в четврток тој ќе го соопшти списокот со имињата на играчите кои ќе настапат против Србија. Неговиот прв помошник Вујадин Станојковиќ, завчера ни изјави дека само неколкумина стандардни репрезентативци се наоѓаат во натпреварувачка форма, а дека поголемиот дел од репрезентативците се наоѓаат во фазата на подготвителен период на нивните екипи пред стартот на пролетниот дел од првенствата на Стариот континент.
Добро, јасно ми е дека можеби Скопје не е опција за овој натпревар, ама Охрид??? Тоа дека е добар теренот во Охрид, добар е, многу пати сум бил таму, ама стадионот има едвај едно трибинче и не е за натпревар на репрезентација, посебно не со ваков противник кој може да наполни многу поголем стадион и да се направи поубава атмосфера.
Иако цело време како алтернатива се спомнуваат стадионите во Прилеп и Струмица, мислам дека најдобро решение за овој натпревар се стадионот во Тетово кој е навистина супер и Битола, затоа што “Тумбе Кафе“ ќе биде фул за овој натпревар и има идеална местоположба: ќе има навивачи од Битола, Прилеп, Кичево, Ресен, Охрид, Струга... А уште подобро ќе беше да си гостувавме во фебруари и решен проблем.
Ама ете, изгледа ќе не изненадат со некоја глупост.