ОД „ВЕРСАЧЕ“ КУПИЛЕ ОБЛЕКА СО КРУШЕВСКИ ВЕЗ
Рачно изработена облека со традиционален крушевски вез откупувала светски познатата модна креаторска куќа „Версаче“ од Италија. Вака тврдеше Спасика Тасеска, претседателка на организацијата на жени „Цвет“ додека н` шеташе низ собите со изложени ракотворби низ етнокуќата „Ѓорчевци“ во Kрушево, стара 200 години. Во една од собите со староградски изглед беа изложени копии на облека што ја сплеле вредните крушевчанки, а оригиналните примероците ги откупил светски познатиот моден бренд „Версаче“. Тоа беа џемпери, пелерини, марами и други модни додатоци што пленат со својата оригиналност, македонска плетка и вез. Додека раскажуваше Тасеска носеше фустан изработен според модел стар 150 години.
- Нашите везови и плетки ги прифатија од „Версаче“. Италијанска фабрика што шие за нив слушнала за нашата рачна работа и н`побараа. Беа воодушевени од македонскиот традиционален вез. Се договоривме да ги работиме везовите за нив, џемпери, блузи, фустани, во разни модели од конец, од волна. Од фабриката сами ги дизајнираа, волната ја фарбаа и изгледаше многу убаво - вели Тасеска.
Баба Ванѓа плете 65 години
Македонски ракотворби биле откупени и за филмот „Езерска куќа“ (2006) во кој главниот лик го играла познатата американска актерка Сандра Булок. Изработките биле направени под менторство на дизајнери од Америка, кои пред неколку години дошле во Kрушево да ги подучуваат крушевчанки во склопување на моделите.
Меѓу вредните плетачки што ги подготвиле моделите за италијанскиот и американскиот пазар е и баба Ванѓа Топузовска, која на 73 години има остар вид како орел и со чингелаче и иглици реди македонски плетеници.
- Бог ме наградил со видот. С` уште ме држат очите и многу убаво можам да плетам. Имам изработено многу плетки, бројот ни самата не го знам. Плетам од осум години. Моите изработки завршиле на францускиот, италијанскиот, американскиот и на кинескиот пазар - вели Топузовска.
Нема поавтентичен амбиент за изложување на овие плетки и везови од амбиенталната куќа на „ Ѓорчевци“, која викендов, за време на манифестацијата „Откриј го Kрушево“, ширум ги отвори вратите за посетителите.
- Биле четворица браќа и таткото, касапи, бакалџии и занаетчии. Газдата на куќата, мојот дедо, го викаа Ванѓул Беличо. Тој глумел божем пријател на Турците, опинчар бил, а ги штител нашите комити. Над Kрушево имало ливада, им носел храна на комитите, а неговите потомци на ист начин им помагале на партизаните. Kуќата имала и скривници - раскажува Соња Здравеска, по потекло од семејството Ѓорчевци.
Бакрданик и маштеница – добитна комбинација
Покрај изработките, строградскиот амбиент, историското минато, и традиционалните јадења привлекуваат туристи во Kрушево. Викендов градот мирисаше на чомлек и бакрданик зготвени по стари македонски рецепти уште од времето на Илинден. Чинија бакрданик и маштеница се служеа по цена од 180 денари.
- Бакрданикот го подготвуваме повеќе од пет саати. Пченкарното брашно се потопува, па постепено се потпекува, се вари, па дупи дупка со сукало на средината, така се меша. Потоа се подготвува свинското месо, малку мрсничко да има на него зашто бакрданикот е посна храна. Порано ставале кравја маст. Рецептот сме го зачувале од нашите предци од периодот на Илинденското востание, тие се стари македонски јадења - вели Жан Здравески-Шапе, кој 33 години се занимава со угостителство во Kрушево.
KРУШЕВО НА МАПАТА НА СВЕТСКАТА АСОЦИЈАЦИЈА ЗА АВАНТУРИСТИЧКИ ТУРИЗАМ
По долги години градот на македонскиот непокор живна преку многубројните несекојдневни активности организирани во проектот „Откриј го Kрушево“ - искачување со жичница, посета на рестораните на бачило, прошетка со коњи, летање со параглајдер, забава со музички состави. Манифестација беше организирана од Центарот за развој на Пелагонискиот регион, Проектот за експанзија на мали бизниси имплементиран од „Kарана корпорација“, Агенцијата за промоција и поддршка на туризмот во РМ и Општина Kрушево.
- Kон крајот на август и почетокот на септември ќе донесеме претставници на Светската асоцијација на авантуристички туризам, 25 туроператори и светски новинари, чија цел ќе биде да мапираат важни локации во Македонија, кои подоцна ќе можат да се продаваат како места за авантуристички туризам - изјави Емилија Героска, директорка на Центарот за развој на Пелагонискиот регион.
Жанета Здравковска
http://www.dnevnik.mk/?ItemID=F3C402DCCA2CB4438292CA9AC8B114FA
