Во светот на Linux
[18.9.2004]
Развојот на слободниот софтвер и неговата се поголема популарност кај нас ја наметна и потребата од соодветна стручна литература на македонски јазик. Книгата „Во светот на Linux“ е засега единствено издание од овој вид во Македонија. Автор на книгата е дипл.маш.инж Деан Јошевски, а издавач е Интегра инженеринг од Битола.
Книгата е наменета за почетниците во работата со компјутери или пак за оние кои за прв пат се среќаваат со оперативниот систем Linux и програмскиот пакет openoffice.org.
Првиот дел на книгата е наменет за општо запознавање со оперативниот систем Linux и со компјутерот. Во оваа секција се дадени каратки описи за секоја од компонентите кои го сочинуваат компјутерот и објаснета е нивната намена.
Вториот дел започнува со упатството за инсталација на оперативниот систем и понатаму дава објаснување за процесот на работа во системот.
Во третиот дел детално е претставен принципот и упатството за работа на двете најголеми алатки од пакетот openoffice.org и тоа поединечно: текст процесорот Writer и програмата за табеларни пресметки Calc.
Следејќи го принципот на слободен софтвер, а при тоа знаејќи ги потребите на корисниците, еден дел од оваа книга авторот му посветува на Интернет. Дадени се објаснувања и упатства за работа со Интернет прегледникот Mozzilla, како и упатство за користење на клиентот за електронска пошта Mozzilla Messenger.
Стручната терминологија е преземена од англиско јазично подрачје, поточно користена е изворната терминологија, а на крајот од книгата е поместена секција во која се дадени објаснувања на термините.
Во светот на Linux може да се набави по цена од 200,00 денари