Еден од инвеститорите на станбено деловниот комплекс „КОСМОС“ што се наоѓа во населбата Керамидница на ул. „Перо Наков“ бр.94, Фиат Цаноски денеска во изјава за медиумите ги отфрли наводите на општина Гази Баба дека станува збор за неправилности кои општинскиот градежен инспекторат ги утврдил во објектот.
Цаноски тврди дека се платени комуналиите во висина од 135 евра за метар квадратен, „КОСМОС“ треба да се гради уште 35 или 40 метра во висина и не е отстапено од висината и ширината на објектот за ниту еден сантиметар. Ратите за комуналиите, посочи тој, редовно се плаќаат, а за првиот објект изнесуваат 5 милиони и 300 илјади евра.
- Два месецa не се работеше на градилиштето, мораше да се направат конзервации, 100-тици луѓе да седат, да се упропастуваат материјали. Уште во јануари ми се направи штета од неколку милиони евра. Првпат инспекторот стапнал на 30 мај во објектот. Записник за неправилности не ни е доставен и немаше никаква забелешка иако дел од објектот беше изграден. На 15 јули доаѓа инспекција и носи записник во кој своерачно поправени се податоците што е забрането со закон. Истиот ден попладне доаѓа инспекција и наведува дека дел од едната гаража излегува на некоја висина на околу метар и 43 сантиметри и истиот ден носи решение за затворање на градилиштето и за отстранување на градба, рече Цаноски.
Тој појасни дека бил донесен заклучок за уривање на објектот од површина од 35 илјади квадратни метри во рок од пет дена и според него, решението за уривање било донесено на нерегуларен начин. Тврди дека му било одобрено барањето за измена на проектот и во рок од 5 дена направиле дополнување на проектот само за измените како што било побарано од нив. Укажа на нерегуларно носење заклучок на решенијата за уривање и затворање на градилиштето. Се пожали дека од полицијата не му било дозолено да влезе во објектот. Вели дека ги презел сите потребни мерки и оти има доставено комплетна документација, дека инспекторката немала налог за уривање, а и полицијата била дојдена без налог. Поднел кривична пријави за инспекторката за неовластено носење на решенија, а најави кривични пријава и за градоначалникот на општина Гази Баба, за надлежниот инспекторат, за министерот за транспорт и врски и за сите останати инволвирани во случајот.
Одговарајќи на новинарско прашање дали изменетиот проект е регистриран во општината, рече дека поднесено е службено се што било побарано. - Дозволата за градба не е одземена, а објектот веќе почна да се руши. Имаме доста продадени станови, но за тоа што ќе биде срушено ќе бараме огромни штети кои ќе ги сноси Буџетот на Република Македонија. Јас имам кредит од банките, имам изгубени добивки и материјали. Сега ни ги упропастуваат и алатите.Имам информации дека се чекало уште три-четири ката да се изградат за штетата да биде уште поголема, рече Цаноски.
