Најнапред, здраво на сите на форумов. Ова е мојот прв пост на Кајгана и имам потреба да го споделам моето искуство на оваа тема.
Се викам Виктор и имам 27 год. Кога бев мал, при систематските прегледи им беше посочено на моите родители дека имам кифоза. Носев појаси за исправање на грбот, ме носеа на вежби и ред други работи, а докторите ни посочија дека во иднина, како што ќе стареам и како што ќе минуваат годините кифозата ќе ми прави проблеми.
Проблемите започнаа пред извесен период - од болки во десната рака, болки во вратот, болки при голтање, отежнато дишење, до тахикардија.....На специјалистички преглед кај оротопед ми беше дадена дијагноза ДИСКОПАТИЈА. А во меѓувреме, од еден пријател слушнав за фамозниот доктор Туран и се упатив во неговата ординација да побарам помош.
Докторот не знам ни дали може да се нарече „доктор“, а неговото дуќанче не знам дали може да се нарече „ординација“. Во дуќанот, со големина од некои 10 м2 и две-три столчиња, постојано има триесетина напатени луѓе со мака, кои чекаат стоечки на ред. Аред нема никаков - кој како стигне влегува и излегува.
И така, јас прв пат влегувам во сопчето, уплашен и возбуден и почнувам да го опишувам мојот здравствен проблем. Само што почнав, не кажав ни три збора, ми рече: „Ти си грбав, не ми кажувај мене што ти е. Легнувај тука и не ми го троши времето“.
Јас легнав со помислата дека ќе ме прегледа, ќе ме опипа и ќе уочи за што се работи. Но како што легнав, веднаш ми го крцна грбот со притискање, и вика: „Ајде станувај. Утре пак да дојдеш.“
Станав збунет и си заминав. Кога излегов, се замислив каде сум отишол, бев збунет и размислував. Си реков ајде ќе одам утре пак, па ќе му објаснам каде ме боли и што ми е. Од една страна, си мислев дека работата не е во ред, а од друга страна си викам штом има толку луѓе сигурно човеков знае што прави.
Наредниот ден одам и повторно чекам. Ме вика во сопчето, влегувам и му викам: „Вчера не ми дозволивте да ви објаснам за мојот проблем“, а тој ми вика: „Ти многу зборуваш, ќе те избркам. Ајде легнувај тука.“ Јас повторно збунет легнав и поворно ме крцна за 5 секунди и ми рече утредента пак да дојдам.
Во моментот се почувствував чудно, почнаа да ми зујат ушите. Станав и како што искочив од дуќанчето, срцето почна да ми чука многу брзо, почна да ми снемува воздух и да се гушам. Како што одев кон паркингот, ми стануваше сè полошо и почнав да се губам борејќи се за воздух. Од карши дојде еден човек, ме виде дека се навалив на оградата, забележа дека не сум добро па донесе вода. Дојде уште една жена со која се обидуваа да ми помогнат - ме прскаа со вода по лицето. Ми требаа двасетина минути да се вратам во нормала.
Во тие два дена, уочив дека човекот е многу арогантен и некултурен со крајно непрофесионален однос и простачки уличарски речник.
Кога еден човек му кажа дека докторката му рекла дека има спондилоза, Туран му рече: „Да и кажеш на докторката к**** да ми го јаде!“.
Подоцна една младa девојка ја крцкаше и откако ја крцна така легната на масата, на крајот ја плесна по задникот и рече „Ајде готова си“.
И најтажно од сè беше кога една женичка го молеше да ја прими мајка ѝ. Стоеја двете фатени под рака, исплашени објаснуваа дека биле кај сите лекари, дека жената има 57 год. и дека знаат дека тој не прима постари од 50... Но тој не сакаше да ги прими и згора на сè ѝ вика: „Што е мајче? Што му ја мислиш? Треба да се умира!“ Жената уште еднаш го замоли, а овој ѝ одговори „Џабе ме молиш, и до утре да ме молиш не можам да ве примам“. Двете заедно фатени под рака со главите надолу си заминаа...
Една девојка, кога искочи ѝ рече да џвака почесто мастика. Јас не сфатив зошто ѝ го кажа тоа... дали девојката имаше непријатен мирис во устата или се работеше за нешто друго, не сфатив.
Пред да одите кај овој човек запрашајте се:
- Зошто работи од 8 - 12?
- Зошто ги остава пациентите да чекаат стоечки?
- Зошто постојано ги заплашува со реченицата: “Сакаш нож или сакаш јас да те средам за 50-100 евра“?
-Зошто е арогантен? Зошто работи на брзина?
Сето ова го напишав бидејќи чувствував потреба да го споделам моето искуство и се надевам дека ќе ви биде од корист. Бидете претпазливи каде одите и со кого си имате работа, поготово кога се работи за вашето здравје. Јас мојата лекција ја научив, а тоа е да не дозволувам на никого да ме допре сè додека добро не ме ислуша, па дури и кога се работи за најобична масажа.