Спектакуларен концерт на Каролина Гочева во Ресен На Градскиот плоштад синоќа се одржа можеби еден од најголемите концерти во историјата на Ресен.
Пред огромен број на присутни точно во 20 и 30, Каролина го започна концертот со евровизискиот хит "Мојот свет".
Во текот на концертот беа испеани и повеќе песни од нејзините постари албуми, за потоа да бидат отпеани и антологиските "Јовано Јованке", "Македонско девојче" и "Ако одам во Битола".
Отпеана беше и песната "Од нас зависи" со која Каролина прв пат настапи на Евровизија и ја претставуваше Македонија во Талин, Естонија во 2002.
Каролина, концертот го заврши со своите најнови хитови "Птицо малечка" и "За кого" од последниот албум кој беше издаден оваа година.
На преполниот плоштад концертот го следеа голем број на граѓани кои дојдоа од целата Преспа, имаше и многу гости од соседниот град Битола.
Концертот беше во организација на Градоначалникот на Општина Ресен, Г-дин Димитар Бузлевски, а беше подржан од спонзорите на Преспанскиот јаболкобер.
Концертот претходно требаше да се одржи на 28 септември, но како што е познато поради силните врнежи беше одложен за 10 октомври 2008.
Се на се концертот донесе позитивна енергија кај Ресенчани, кои одамна не се имаат насобрано во толку голем број, а на едно место, на ваков настан од забавен и културен карактер.
Каролина Гочева важи за една од најпопуларните македонски поп пејачки и досега има присуствувано неколку пати во Ресен, последен пат таа ги забавуваше матурантите од ланската генерација на Доделувањето на дипломите.