Постов го пишувам после слушање на песна на Zeebomb која што го носи името SOS (а мислам на почеток името на песната беше Zelen SOS).
За да ви ја доловам поентата на песната и за што се пее во неа, ќе оставам во прилог неколку стихови:
,, барам SOS од тебе зависам, никаде не води ова ни сам знам - на иста лага паднав пак. "
,, сто пати на ден ме убива свесно, и ме чита пак ме остава без збор, се е дежаву стоиме во место."
,, меѓу нас е пепел и дим, ама не би признал немој ни ти, да јас скапо плаќам ко да сум крив."
,, а проблемот очигледен е, можеш сите да ги лажеш само мене не."
" крај е само не сакаме да разбереме, да секој пат наводно последен е."
" и ми прија, знам дека не ми треба, ама ми прија."
Нормално, на некој од страна овие рими му се кринџ, неповрзани со темава или пак му алудираат на нешто скроз друго - а не за психичка зависност од вутра, ама тие кои што се бавтале со вутра долга низа години и чаделе солидни количини, мислам дека текстот и песната им е ептен релевантна и им е разбирливо што сакаат артистите да кажат со песнава.
Углавном, постов не го пишувам за да рекламирам песна, ниту пак да ви оставам стихови, туку сакам да почнам тема у темава у врска со психичка зависност од трава.
Од моја перспектива и од мое искуство, како некој кој што конзумирал вутра, или пак народски кажано дувал 8 години, висел со разноразни типови на луѓе вклучувајќи дилери, дувачи и џанкери заглавени на разноразни срања - сметам дека травата и те како може да биде психички зависна.
Да се разбереме, травата не е физички зависна како што физички се зависни опијатите и бензодиазепините, но дефинитивно травата има потенцијал за создавање на психичка зависност кај конзументот, а и при апстинирање од трава после користење подолг временски период или пак големи количини рекреативно - се јавува апстинентска криза која иако не е на ниво на опијатската или бензодиазепинската, но сепак постои.
Ќе почнеме прво со контраефектите кои што се јавуваат при користење на марихуана секојдневно подолг временски период и/или поголеми количини;
- недостиг на апетит кога си трезен.
- зголемено ниво на депресија и/или анксиозност.
- зголемено ниво на параноја.
- зголемено ниво на апатија.
- инсомнија и/или спиење повеќе него вообичаеното.
- сува и бледа кожа, гломазни подочњаци.
- демотивираност, пасивност, летаргичност, незаинтересираност за општи работи и слично.
- голема толеранција спрема ТХЦ, хајот е далеку помалку интензивен и побрзо поминува.
- можност за појава на деперсонализација / дереализација.
- можност за појава на шизофренија или пак друго психотично растројство доколку имаш фамилијарна историја за шизофренија и психотички стања.
Прво - се е субјективно. Не мора да значи дека тој што дува често, секојдневно и во солидни количини дека ќе ги има сите овие контраефекти, но најчесто барем некој од овие контраефекти евентуално ќе ги осети или ги осетил, нормално, доколку корисникот некогаш саморефлектирал.
Сега, контраефекти при апстиненција од марихуана која што корисникот ја користел подолг временски период и/или во поголеми количини;
- недостиг на апетит.
- зголемено ниво на депресија и/или анксиозност и други анксиозни стања.
- зголемено ниво на агитација, нетрпеливост и слично.
- инсомнија.
- чудни и интензивни сонови.
- зголемено потење поготово при спиење.
- константни и брзи промени на расположение.
- потреба за конзумирање на марихуана пак, или алкохол или други психотропни супстанци се со цел да се ублажат/намалат контраефектите од апстиненција од марихуана.
Да се разбереме - што од ова ќе почувствувате и колку интензивно ќе почувствувате, како и тоа колку време ќе ви траат овие контраефекти како резултат на апстиненција од марихуана после долгогодишно користење или пак злоупотреба, зависи само од тоа колку време секојдневно се користеле и во кои количини сте користеле.
Од моја гледна точка, најголема причина поради која што настапува психичка зависност од марихуана е социјалниот круг на конзументот или у превод, ако се дружиш со четири дувачи, ти си петтиот. За откажување од зависноста или пак апстинирање од марихуана одреден период се со цел да си ја ресетираш толеранцијата, (најчесто) потребно е да се дистанцираш од луѓе кои што конзумираат или пак се во близина на трава.
Покрај тоа, други причини поради кои што би можела да настапи психичка зависност се;
- самомедицирање на психички растројства (депресија, анксиозност).
- социјална средина.
- addictive personality т.е личност која што генетска предиспозиција и е склона кон зависности.
- депресија, анксиозност и други психички пореметувања.
Мислам дека во денешно време имаме две екстреми на луѓе - луѓе кои што тврдат дека марихуаната е штетна, зависна и е gateway дрога кон други дроги, како и луѓе кои што мислат дека марихуаната е скроз безопасна, секојдневното користење не остава никакви последици и сметаат дека секојдневно конзумирање на истата е здраво и слично. Ниту првите, ниту пак вторите се во право.
btw, пред да ме нападнете, тоа што пушите џоинт чат-пат, еднаш неделно или само во социјални кругови кога некој ќе ви понуди, не значи дека вие ќе ги искусите контраефектите кои што доаѓаат од секојдневното користење на марихуана или пак од злоупотребата на марихуана. Контраефектите кои што ги наведов обично важат за луѓе кои што подолг временски период (според мене, барем половина година) активно, секојдневно користат марихуана во рекреативни цели и тоа во солидни количини од грам до грам ипол дневно.
Умереното користење е клуч за да се избегнат било какви апстиненцијални психички кризи или пак контраефекти од користење.
Би сакал да чујам ваши коментари, ваши искуства во врска со оваа тематика, слободно корегирајте ме некаде доколку грешам.