22, последен ден од летото.
Лето...темен тен, коктели, вештачки нокти, кратки фустанчиња, авантури, романси, ноќи без сон, излет на прекрасни места, семејни дружења, смеа, радост, љубов...нови пријатели, нови хоризонти, нови погледи кон светот!
Па, не беше лошо!!
Освен фактот што немам сексуљав албум Лето 2013 на фб. Простено ми е? Ама нема врска што не постирав фотографии 24/7 од мојот здрав режим на исхрана, убаво ми беше. Топ ми беше.
Стареам. Јаболче, на пат да ја добијам вистинската посакувана боја. Можеби, а можеби и не. Можеби ќе си останам слободен дух, безгрижна и вљубена во светот. Во камчињата, песокот, водата, дрвјата, мирисот на крофни, цимет. Можеби сеуште ќе сметам дека најбезбедното место за мене е помеѓу мама и тато, па во сред ноќ ќе им се вовлечам под прекривката, како што правев како малечка и сите чудовишта исчезнуваа. Сега, проблемите ќе исчезнат? Барем за кратко? Јаболче, ама секој сам треба да се соочи со чудовиштата и со светот!!
Есен.
Вам не ви се допаѓаат обоените листови кои паѓаат на земјата? Не ви се допаѓа мирисот на костени кога поминувате низ град? Не си велите дека на враќање ќе си земете пошто моментално се брзате за на состанок? Не ви се допаѓа кога потскокнувате за да ги избегнете вирчињата? Или кога го споредувате мило Скопје со Венеција? Кога шетате по Ленинова со драгиот кој ве прашува дали ви студи? Кога наликувате на Рудолф, со црвено носе, а тој мисли дека сте многу слатка и ве прегрнува? Или пак кога љубената ве погледнува со поглед кој зрачи со нежност, ви зборува со поглед, а вие сакате да го запрете времето, паѓањето на листовите, дувањето на Вардарец кој ја разлетува нејзината коса?
Не ли ви се допаѓа мирисот на капучиното кое ви го припремила мајка ви, мирисот на цимет кој ја исполнува цела соба, а вие сте внесени во некоја книга?
А сите оние шарени и прекрасни марами и шалови? Девојки со црвени палта кои гламурозно чекорат по градските улици? Дечки со привлечни мистериозни погледи?
Преполно Скопје? Дијалекти, луѓе, лизгави сокаци низ чаршија?
Јас, обожавам!
п.с. Мислам дека оваа есен ќе си се снабдам со гумени чизмички...или евентуално - чамец. Ах, есен!