Што се замислуваш бе ти? Мислиш дека можеш туку-така после толку години да се вратиш во мојот живот и да очекуваш се да продолжи таму кај што застанало? Мислиш дека доволни се два-три слатки збора и твојата малечка пак ќе падне пред тебе? Епа жал ми е, јас веќе не сум малечка. А уште помалку твоја. Затоа кажи ми, како се осмелуваш да бараш од мене да оставам се што сум изградила последниве милион години додека ти беше некаде на друг крај на универзумот и да скокнам во твојата прегратка како цело време само тоа да сум го чекала? Со кое право бараш такво нешто? Со кое право? А?
Самиот рече, те знам повеќе од пола живот. Да, јас тебе те знам. Но ти мене веќе не. Јас пораснав малечок. Ти остана на истото место кај што беше тогаш. Веќе одамна не паѓам на финти како твоите. Провидни, излитени и сто пати видени фори. Но верувај, сепак научив нешто од тебе. Ако денес умеам да бидам сурова, безмилосна и ладна, ако умеам да газам преку чувства и да кршам срца, за сето тоа си заслужен ти. Сето тоа од тебе го научив.
Памтам, еднаш ти реков дека кругот се врти. Можеби не се ни сеќаваш на тоа. Но еве, кругот се сврте. Сега ти си тој што на колена ме моли за трошка љубов. Љубов која никогаш нема да ја добиеш. Долго време мечтаев за овој момент. Конечно го дочекав. Но, замисли, не ми донесе никаква сатисфакција. Едноставно, со текот на времето сум станала рамнодушна на тебе.
И еве, овде ќе дадам одговор на прашањето кое ми го постави: „Не, веќе одамна не чувствувам ништо за тебе“. А тоа нема да ти го кажам само затоа што сакам да те копка, да те измачува исто како што ти мене со години ме измачуваше.
Ти посакувам се најубаво. Ти посакувам да најдеш мир, љубов и среќа. Што подалеку од мене.