ГИ ПЛАЌАЛЕ ПОЛИТИЧАРИТЕ ДА ШИРАТ ОМРАЗА
Поранешен агент на ЦИА: Потрошивме милиони долари за да ја растуриме СФРЈ
Роберт Баер, поранешен агент на ЦИА,
тврди дека милиони американски долари биле потрошени за да се разбие поранешна Југославија, пишува
Новости.
Баер тврди дека тогаш тој и неговите колеги добиле милиони долари за да влијаат врз политичарите и да предизвикаат распад на Југославија.
„Подмитувавме партии и политичари, кои поттикнуваа омраза меѓу народите“, вели Баер.
Тој истакнува дека еден американски сенатор за време на војната во БиХ му кажал дека Сребреница ќе биде главната вест на насловните страници на светските медиуми.
„Дури ни кажа дека можеме да воспоставиме контакт со медиумите“, истакна Баер.
Овој поранешен агент на ЦИА бил уапсен неколку пати во изминатите години поради откривање државни тајни. Досега има објавено повеќе книги за американската разузнавачка агенција, за Бил Клинтон и Џорџ В. Буш.
„Во Сараево првпат стигнав на 12 јануари 1991 година. Дојдов со хеликоптер со уште тројца агенти. Задачата ни беше да внимаваме на српските терористи кои требаше да го нападнат градот. Имавме информации дека ќе се случат неколку терористички напади во градот поради намерата на БиХ да излезе од поранешна Југославија. Но тоа беше лага, нашите шефови нè излажаа. Нашата примарна задача беше да шириме паника меѓу политичарите дека ќе се случат напади“, изјави Баер.
Тој истакна дека задачата траела две недели, а потоа заминал за Словенија на нова мисија.
„Целата операција траеше еден месец и го носеше називот „Вистина““, вели Бауер.
Тој додава дека во Словенија, која била спремна за независност, неговиот тим добил повеќе милиони долари за да финансираат невладини организации, опозициски партии и политичари што ќе промовираат омраза.
„Целта на пропагандата беше да се растури Југославија“, вели Баер.
Тој истакнува дека оние што ја предизвикале војната сега се сопственици на компании кои ги користат природните и другите ресурси на земјите од поранешна СФРЈ.
„Едноставно од вас направија робови. Сега мора да увезувате многу нешта од други земји, а бидејќи немате пари, ќе мора да се задолжувате. Тоа е вистината на целата приказна околу Балканот“, истакнува Баер.
На крајот тој ги повика луѓето на Балканот да не се мразат и да го заборават минатото, кое било дел од една голема претстава