Виница и Блатец полека се празнат
03.07.2010 16:32
Убава природа, шума, и вода во виничкото село Блатец има се-освен луѓе. Половина село веќе заминало на печалба.
„Сите соседи се заминати во странство. Еден во Австралија, друг во Словенија, трет во Швајцарија“, вели Киро Голубов, жител на с. Блатец.
Ако според последниот попис во Блатец биле регистрирани 2000 жители сега има одвај 1000, претежно стари луѓе. Според нивните кажувања од некогашното големо село со 700 куќи останале одвај 200. Љупчо Тодоров од село Блатец има две невработени ќерки со факултетски диполоми, синот веќе заминал на работа во Словенија, ако имаат шанса, надвор ќе заминат и ќерките.
„Многу ретко можеш да видиш млад човек. Сите отидоа во Италија и по странство. Тука нема работа, нема егзистенција, нема ништо“, вели Тодоров.
Секоја среда од автобуската станица во Виница заминува по еден автобус за Италија. Според официјалната веб страница на општина Виница, лани, дури 80 деца од општина Виница, биле отпишани од училиште.
„Сега во училиште има по шест или седум деца во одделение. Во нашите подрачни училишта во с.Лаки и во с.Липец има по шест деца во сите одделенија“, вели Николина Јанкулова, поранешен наставник во с. Блатец.
Денес во гратчето Канели во Италија има повеќе првачиња отколку во Блатец.
„Таму има повеќе деца, над 30 да се запишат во прво одделение, поради што тоа гратче го викаат Блатец“, раскажува Тодоров.
Приватизацијата ги оставила жителите на Блатец, без работа. Па, парче леб побарале во странство.
„Немат тука работа и немааат што да бараат, па спас наоѓаат надвор“, вели жител на Виница.
„И тој што останал се покајал затоа што не си заминал“, вели Венко Серафимов, жител на с. Блатец.
Безвизниот режим и бугарските пасоши ги испразнија Виница и Блатец. Општината ќе ги враќа жителите со развој на економијата.
„Во тек е изработка на детални планови за мало стопанство, со цел да ги мотивираме оние што заминале и заработиле нешто да вложат и да се вратат назад“, вели Емил Дончев, градоначалник на Виница.
Блатец е само едно од местата во Источна Македонија што младите ги напуштаат во потрага по егзистенција. Старите остануваат само пребројуваат колку порти останале затворени.
http://www.a1.com.mk/vesti/default.aspx?VestID=124910
Виница се празни, годинава 82 првачиња се отпишале и се иселиле во странство
Во учебната година која штотуку заврши дури 82 дечиња што се запишале во прво одделение во училишта во Виница не ја звршиле годината, бидејќи се отпишале и се иселиле во странство со родителите (најчесто во Италија), што претставува рекорд, според кој, идната школска година во виничките училишта ќе има три паралелки помалку во второ одделение. Колку за илустрација, во изминатите 8 години само 37 деца од основните училишта од Виница и Виничко се отпишале среде учебна година и се иселиле во странство.
Од вкупно иселените 82 првачиња во школската година што заврши 56 се од градот Виница, 11 се од Блатец и 15 од Драгобраште, што значи трендот на одење во странство на привремена работа се сели од селата во градот.
Утешително делува податокот дека сепак во јунскиот уписен рок се запишале 12 првачиња повеќе отколку лани истиот период или вкупно 179, што незначи дека во септември наставата во основните училишта во Виница ќе започне токму со 179 првачиња, бидејќи до тогаш уште некое семјство може да најде работа во странство и да замине во некоја од европските држави заедно со децата.
канал77