Беше есен и рано и ладно и темно, но темнината беше удобна и топла,
и бев станат порано,
и имав време да се средам и да фатам автобус и да стигнам.
Да стигнам зашто требаше да замине и знаев дека ако сакам пак да ја видам ќе треба да ѝ пишам и да ја викнам,
а ако ѝ пишам и ако ја викнам ќе треба да ѝ кажам зошто ѝ пишувам и зошто ја викам,
а ако ѝ кажам можеби ќе одлета уште подалеку,
а ако одлета уште подалеку од се ќе истинам и не знам дали темнината ќе може пак да ме стопли.
А автобусот стигна и сега беше навистина студено зашто сонцето веќе беше изгреано и ја немаше темнината да ме стопли,
па итав да стигнам крај неа,
а додека итав таа беше со мене, зашто секогаш кога не сум крај неа таа е со мене.
И стигнав, а таа не беше дојдена, па седнав да ја чекам и ми беше ладно.
И кога најпосле дојде, ѝ ја слушнав смеата која најбистро ѝ ѕунеше како што секогаш ѝ ѕунеше кога се смееше,
и се стоплив,
и се стопив,
и се насмеав од уво до уво,
и таа виде и и таа се насмеа, иако не знаеше,
и ѝ пријдов, и се згреав од топлината што ја расфрлаше со убавината на лицето и на косата и на очите и на смеата, како што секогаш потајно се греев без таа да знае,
и ѝ кажав многу работи,
но не се.
Не ѝ кажав дека кога кога ми е ладно и кога ја немам темнината да ме стопли,
ја мислам неа и најубава топлина ми мине по грбот и најмилно ме грее.
А кога и е темно и мислам на неа,
Кога и темнината ме топли и помислата на неа ме грее,
толку се загревам што се топам и тонам во топлина која е толку мека и мила и најубава,
и се прашувам,
ако темнината и помислата на неа заедно толку многу можат да ме згреат,
колку ли ќе се згреев ако наместо во мислите, навистина ја имав крај себе во темно,
и дека тогаш сигурно ќе изгорев и ќе умрев.
А ако изгорам и ако умрам нема да можам да ја мислам и нема да можам да ја сонувам,
и затоа сега сакам вечно да живеам, за да можам вечно да ја мислам и да ја сонувам,
зашто вечно сакам да ме грее како што секогаш потајно ме грее без да знае,
со убавината на лицето и на косата и на очите и на смеата,
зашто од неа ми е најтопло и најмеко и најмило и најубаво.
