Не ми се верува дека се работи за монтиран случај. Има едно
правило, вели, никогаш не барај злонамерност во нешто, кое што може адекватно да биде објаснето со некомпетентност.
Целиот случај е воден аматерски, особено во координацијата на различните ентитети кои имаат удел во целата машинерија на контрола на храната, и најмногу во справувањето со медиумите.
Самата бактерија ја има во изобилство околу нас, ја има во почвата и особено во самите животни кои се колат, па дури и 10% од луѓето ја носат како клицоносители без да им прави штета. Ништо чудно да биде најдена во готов производ, всушност како што кажаа, била најдена во 50тина различни производи. Работата е да постои процедура во текот на производството која ќе биде листерицидна, односно ќе ги убива најголемиот дел од бактериите и ќе спречи да има толкав број што во текот на рокот на траење не би се размножиле до неприфатливо ниво.
Самиот ХАСАП сертификат со кој сите се фалат, не е само една диплома, тоа е начин на спроведување на производството, тоа не е само еден ден, туку секој момент од работата. Предвидува редовно земање мостри од сериите за испитување. Во случај каде во еден примерок е најдено неприфатлива концентрација на бактериите, веднаш треба да се побара документација дали е земено мостри од таа серија, кој зел, кој испитал. Ако не било предвидено да се зема, кој одобрил намалена контрола и врз кои фактори. Да се види кое месо е употребено, од која кланица и кој број на маркица. За ваков процес нема никој најавено.
Напротив, бил земен по една единица од секој производ како мостра, нема таква процедура за земање мостри, треба да се земат барем по 5 единици и тоа по случаен избор. Затоа што крајното толкување е невозможно да се направи со една единица мостра.
Била најдена бактерија кај многу од тие единици, ама само кај еден примерок кој е производ готов за употреба. Не се открива повеќе фактори за тој примерок, начин на дистрибуција и чување, состојба на примерокот, време поминато од производството и слично.
И најголемата грешка е што крајната информација му е дадена да ја објави на јавноста лекар, кој нема никаква обука, ниту одговорност, ниту некаква потреба да барата со вакви податоци, и дава поинаква тежина на самата информација.
Значи процедурата на земање мостри за обичен, секојдневен мониторинг од секоја серија предвидува по барем неколку единици, а не во ваква крајна ситуација кога не смее да се бара резултат со само по една земена единица. Постои цела процедура како се постапува со тој резултат. Резултат од еден примерок е незначаен. Не дека компанијата ја тргам од секаква одговорност, туку дека со една вака водена процедура многу е лесно да ја избегнат таа одговорност и да не можат соодветно да ги процесуираат виновниците.
Во зависност од проценката за растот на бактеријата, во храна во која бактерија не се очекува да расте во текот на дистрибуцијата, дури и е дозволено одредена концентрација на бактерии. Шунката не е таква, и во крајниот производ не е дозволено да има бактерија, ама ете сега компанијата може лесно да се дистанцира од одговорност заради несоодветна процедура и како една од причините наведува и недостаток на квантификација во податокот, кога и самото квалитативно присуство е индикативно за прекршување на правилата.