Софија како што се пренесува од Стразбур, ветила дека ќе ги почитува целосно пресудите на Европскиот суд за човекови права. Ова не е случајно, тоа доаѓа по посетата на кипарскиот пратеник Кристос Пургуридес на Софија, која е прва од ваков вид практикувана од Парламентарното Собрание на Советот на Европа. Мониторинг посетата е потврда дека Стразбур врши притисок врз бугарските власти, за да тие целосно ги спроведуваат пресудите на Европскиот суд за правата на човекот. Софија се задоволуваше да истакне дека пресудите кои се однесуваат на ОМО Илинден-Пирин се исполнети со исплаќање на оштетата, додека за регистрацијата не стануваше збор.
Пургуридес при посетата на Бугарија од 28 до 29 мај, побара од бугарскиот парламент да ја засили контролата и да бдее како Бугарија ги спроведува на дело пресудите на Европскиот суд за правата на човекот.
За време на неговата посета на Софија, тој подетално бил запознат со „Концепскиот документ“ на бугарското Министерство за правда, кој има за цел да ги разреши значајните проблеми кои се поставени со неспроведувањето на пресудите на Судот од Стразбур. Меѓу проблематичните пресуди, Стразбур ги наведува и неколкуте пресуди кои се однесуваат на ОМО Илинден-Пирин и неможноста на оваа политичка партија, која сака да работи на заштитата на правата на македонското малцинство во Бугарија, да се регистрира.
Документот на бугарското Министерство за правда бил усвоен на 9 март годинава од страна на бугарската влада и доставен до Парламентот.
Сепак, Стразбур смета дека не е доволно само донесување на документи, туку бара и нивно спроведување. Известувачот на ПС на СЕ Кристос Пургуридес од Софија добил уверувања дека тоа ќе биде направено.
Инаку до паневропската асамблеја на повеќе пати и се имаат обратено претставниците на ОМО Илинден - Пирин, за да ги запознаат со нивните проблеми за целосно спроведување на пресудите на Судот од Стразбур, поточно неможноста повторно да ја регистрираат партијата.
Ветувањето на Софија, дека целосно ќе ги спроведува пресудите на Европскиот суд за правата на човекот, доаѓа една година по првото посериозно предупредување од Стразбур и само неколку дена пред разгледувањето од Комитетот на Министрите на СЕ, на предметот ОМО Илинден-Пирин, односно дали Бугарија конечно ја исполнила во целост пресудата донесена на 20 октомври 2005. Дали станува за обид на добивање на време или не останува да се сочека.
http://www.time.mk/story_d556ecd53a_article_b90e5e8ecc.html