I'm not there (2007)
Од Боб Дилан знам неколку негови песни, некои испеани од него, некои напишани за некој друг, некои кавер верзии. Редовно ме изненадува кога за некоја позната песна ќе дознаам дека тој е автор. Но речиси ништо не знам за неговиот живот. Кога ob1 го претстави филмот како биографски за Боб Дилан, си реков супер, конечно ќе имам прилика малку повеќе да се запознаам со неговиот лик и дело. Но, испадна дека треба многу добро да се знае животот на Дилан за да може да се следи филмов. Инаку многу работи нема да може да се препознаат, како одредени фази од неговиот живот и творештво и настани кои ја одбележиле неговата кариера. Едноставно ќе немаат смисла. Јасна е интенцијата на режисерот да ги претстави различните аспекти од неговиот контроверзен живот со неколку различни актери (и актерка). Но тоа, како и некористењето на вистинските имиња на личностите само создава уште поголема забуна за неупатените. Во филмот користен е и документарен материјал, кој прашање е колку е вистински документарен а колку е сниман за филмов и прикажан како таков. За познавачите можеби е интересна игра да ги препознаат вистинските сегменти, но за останатите во кои сум и јас крајно напорно за следење. Многу вешто измонтирано сето тоа, тоа морам да признаам.
Црно бели сцени, топли бои, ладни бои. Еден куп симболики од кои ниту една не разбрав. Делот со Ричард Гир како каубој во 19-ти век? Интересен за гледање, ама втф!?
Филм за фановите на Дилан. За другите, ќе го цитирам новинарот на пресот: "I'm not sure I follow".
6/10