Прво, за тие што не знаат и прашуваат зборот ,,родољуб" е синоним на ,,патриот", само што ,,родољуб" е чисто македонски збор додека ,,патриот" e преземен од грчки и латински. Еве што мислам дека претставува родољуб: човек што ја сака и почитува својата земја, го сака и почитува својот народ, јазик и традиција. Човек што со гордост кажува од каде е. Човек што работи во и за татковината. Човек кој се радува на секој успех на својата татковина и човек кој тагува на секој неуспех на татковината. Човек кој со задоволство ги ужива благодетите што природата во неговата татковина му ги дава. Човек кој поминал и видел многу, а со срце чека да се врати во татковината. Човек што го почитува својот земјак. Човек што без двоумење би тргнал да ја заштити татковината ако е во опасност и исто така без двоумење би тргнал да прославува ако има причина за славење. Човек што сака неговата татковина и неговите земјаци да напредуваат во секој можен поглед. Човек што не е себичен и никогаш не ги става личните потреби пред потребите на татковината. Човек што треба да ја фали својата татковина и да ја искритикува кога има потреба од тоа. Човек што ги почитува правилата и законите пропишани во неговата татковина...долга е листата на особини што го чинат родољубот, ако тргнеме да ги набројуваме сите, нема да има крај. Тешко е да се одговори на прашањето дали родољубието е должност или право. Да се прашувам јас би било должност, но бидејќи не се прашувам и сметам дека никого не можеш со сила да го натераш на нешто што не сака, би рекла дека е право. Сметам дека не можеме и не треба да им ги одземаме и ускратиме благодетите што ги нуди нашата татковина на оние што не се чувствуваат како родољуби. Сепак, секој човек е слободен да се чувствува како сака и да прави избор околу тоа што сака и што не сака. Слава им на сите родољуби што на каков бил начин придонеле за доброто на татковината особено слава им на оние што ги дале животите за доброто на татковината. Тие не се само родољуби, тие се херои.Тие секако се многу повозвишени од нас обичните родољуби и оние што воопшто не се родољуби. Јас лично се сметам за родољуб, а другите како сакаат.
