ЕДЕН ДЕН ЌЕ БИДАМ СЕЛЕКТОР...
Намерно или ненамерно. Чедомир Јаневски не е кандидат за селектор на Македонија на изборот в петок, во "Александар Палас". Никој не се ни обидел да контактира со нашиот стратег кој сега е на клупата на Црвена Звезда и кој во јуни е без обврски. Ова е доволен доказ дека ФФМ нема стратегија, нема план и не знае да ги почитува вредностите на она што е најдобро, на она што е наше и на она што има успеси надвор од нашите граници. Премногу понижувачки од страна на фудбалскиот врв кон нашите тренерски имиња кои работат надвор од нашите граници и кои повеќе се вреднувани од странците отколку од луѓето во сопствената земја. Се знае играта на ФФМ и обидот на Хаџи Ристески да си "протне" свој тренер. И првиот човек на ФФМ е свесен дека неговите евтини приказни не можат да поминат кај тренерско име од типот на Јаневски и од стратег кој е голем професионален и човек кој нема кредити кон никого во оваа наша Македонија.
"Не сакам да се манипулира со моето име. Ова е веќе видена приказна и веќе го минав ваквиот период уште пред 3-4 години кога бев во Бриж. И тогаш имаше најави, но во преден план беа некои други тренерски имиња. Свесен сум дека во мојата земја навивачите ме барат и знам дека еден ден јас ќе бидам селектор на Македонија", коментира Јаневски за "Македонски спорт" кој преку нашите страници открива многу детали околу неговото име, шпекулациите и преговорите за селекторската позиција во Македонија.
"Селекторската функција е предизвик за секој тренер. Никогаш нема да го одбијам повикот од мојата земја затоа што јас сум Македонец и поранешен репрезентативец кој добро знае што е национален тим, државен грб и национална гордост. Мене не ме интересираат политики, делегати, гласови.... Јас сум фудбалски тренер и мојата работа е на теренот, на натпреварите. Јас сум тој кој треба да одам по резултати, титули... Така сум научен и така работам. Тоа е мојот стил на работа во тренерскиот занает и таквата работа ме доведе во клубови од самиот европски врв како Црвена Звезда, Бриж, Олимпијакос. Ќе продолжам така и мислам дека ќе успеам. Околу селекторската функција на Македонија можам само да кажам дека ќе дојде и тој ден. Тоа е мојата порака до моите навивачи. Еден ден ќе бидам селектор и тоа е мојата желба", изјавува Јаневски околу неговиот став поврзан со селекторската позиција.
Колку нашиот поранешен репрезентативец ги следи настаните во Македонија, во националниот тим...
"Постојано сум со професионални ангажмани и во слободното време редовно следам што се случува со фудбалот во Македонија со Вардар и со националниот тим. Знам дека сега по заминувањето на Катанец е разнишана атмосферата, знам дека има резултатска криза и знам начин како сето тоа да се надмине. Во последниве денови добив многу повици, но и пораки од Македонија дека сум во игра за позицијата која остана слободна по заминувањето на Катанец. Сето тоа остана само на тие пораки и јавувања, но без официјален контакт со луѓе од Фудбалската федерација на Македонија. Тоа што ми кажувате дека изборот на нов селектор е во петок а мене никој не ми се јавил е доволен сигнал дека не сум во комбинација", е ставот на Јаневски околу контактите со Македонија по најавите дека и тој е во игра за клупата на "црвено-жолтите".
А Јаневски е човекот кој редовно е меѓу кандидатите кога немаме селектор. Редовно и ние медиумите се надеваме дека човекот ќе добие шанса и дека првиот човек со тренерска про-лиценца од Македонија ќе ја добие селекторската позиција. Многу се надеваме, но некои не знаат да ги гледаат работите објективно. Немаат осет и немаат стратегија околу тоа каков профил на селектор и е потребен на нашата репрезентација. Најдобрата комбинација е Јаневски. Тренер со наша крв, а со европски погледи и современ начин на работа. Подобро нема, а и човекот заслужува шанса. Има многу подобро досие отколку Јонуз или Станојковиќ. Споредбата е небо и земја...
"Многу ми значи тоа што медиумите ме бараат, но и навивачите. Тоа е мотивот поради кој и во иднина ќе работам за да докажам дека моите тренерски квалитети се доволни за селекторската функција. Мојот договор со Црвена Звезда истекува во јуни. Пред мене ќе следи нов предизвик. Постојат многу комбинации и алтернативи, но мојот приоритет до крајот на сезоната е пехарот во Купот на Србија и второто место на табелата. Тоа го ветив кога дојдов на 'Маракана' и тоа е достижно за овој тим на Црвена Звезда. А може еден ден, а се надевам многу брзо, ќе ја добијам и довербата за да ја водам репрезентацијата на мојата земја", порачува Чедомир Јаневски, фудбалерот од златната вардарова генерација, капитен на нашиот најпознат клуб, но и капитен на неколку средби на националниот тим во онаа прва генерација. Сега тренер кој со своите 47 години работеше во екипи со европски круни како Црвена Звезда и Бриж. Тоа е доказ дека има квалитет, но тоа не е доволно за оние кои одлучуваат околу селекторската позиција. Прават се за да го анулираат она што е вредно само да постават в.д селектор кој ќе биде по нивни вкус и селектор кој ќе биде под нивна команда. Токму поради ваквите фудбалски неправди и поради незнаењето во ФФМ не треба да очекуваме и да се потресуваме поради резултатите на националниот тим. А народот на многу анкети низ земјава му ја дава довербата на Јаневски и посакува тој да биде новиот селектор. Во него многумина гледаат како спасител...но тоа нема да се случи сега и најверојатно не додека Хаџи-Ристески е на чело на ФФМ.
Извор:
http://www.idividi.com.mk/sport/fudbal/525938/index.html
Значи ова немам видено, доколку сериозно се сака да се стави домашен тренер за селектор од споменатите сметам дека Чедо Јаневски е најдобар за таа позиција, а не Јонуз или таму некој друг од тајфата на Хари. Неверојатно е ова, комплетно сака да не уништи овја хариво!