ЌЕ СЕ УКИНУВА ОБВРСКАТА ЗА ИСПЛАТА НА РЕГРЕС ЗА ГОДИШЕН ОДМОР
К-15 само ако сака газдата
Следната недела работни групи од работодавачи и синдикати ќе почнат преговори за промена на Општиот колективен договор за приватниот сектор.
Работодавачите бараат да се укине задолжителната исплата на регрес за годишен одмор. Предлог на компаниите е К-15 да се тргне од договорот и да се воведе опција парите за годишен одмор на работниците да бидат исплатени само доколку компанијата има пари.
Ангел Димитров, претседател на Организацијата на работодавачи, вели дека за ваквиот предлог има позитивни сигнали од Синдикатот.
"Многу компании имаа финансиски тешкотии за исплата на К-15. Дел од нив ги скратија платите за да исплатат регрес, некои, пак, земаат кредити. К-15 ќе го симнеме на ниво на гранка или, пак, на ниво на компанија. Синдикалните организации во компаниите да преговараат со работодавците и да бараат регрес, нека се развие синдикалното преговарање на пониско ниво. Онаму каде што нема синдикати, нека со основаат", вели Ангел Димитров, претседател на Организацијата на работодавачи на Македонија.
К-15 е ставен во Колективниот договор за приватниот сектор каде што потписници се Организацијата на работодавачи и Сојузот на синдикати на Македонија.
Претседателот на Сојузот на синдикати Живко Митревски вчера изјави дека "опцијата за К-15 останува како право утврдено во Колективниот договор и понатаму, а за модалитети може да се зборува".
На конгресот на ССМ пред две недели, кога Митревски беше реизбран за претседател, тој рече дека поволностите од колективните договори треба да важат само за членовите на Синдикатот, а не за сите работници.
"Мора да градиме нови модели, соодветни на новото време, но и да го отвориме прашањето, за сите членови на Синдикатот да обезбедиме регрес за годишен одмор. За сите членови на Синдикат дополнителни додатоци и надоместоци. Мислам дека е дојдено време кога во колективните договори мора да направиме диференцијација за оние кои се членови на синдикат и оние кои од разни причини не се, а ги користат бенефитите кои ги испорачува Синдикатот. Во овој контекст гранковите синдикати за членовите на синдикатите мора да го регулираат, исто така, ова право во соодветните колективни договори", изјави Митревски.
Работодавците минатата година првпат исплатија задолжителен К-15, кој изнесуваше минимум 40% од просечната плата или над 8.400 денари. За неисплата на регресот е предвидена глоба за правното лице од 2000 до 3000 евра, а за одговорното лице од 500 до 1000 евра.
http://vest.mk/?ItemID=86E54A380AB55846BBFEA1D9DF2E187B