Вугринец уште две години во Металург - „Оваа еуфорија ме потсетува на Целје кога станавме европски прваци“
Ренато Вугринец ја продолжува победничката мисија во Металург и ќе остане најмалку уште две години во редовите на македонскиот првак, откако сам изразил желба да остане во Скопје и покрај понудите од Копер и Вардар Про.
„Пресреќен сум што луѓето во Металург имаат доверба пред се во моите човечките квалитети, а потоа и во ракометното знаење. Јас сакав да останам тука, бидејќи ми е прекрасно во Скопје. Имав понуди и од други клубови, пред се од Копер и од Вардар Про, но сега веќе нема дилеми, продолжувам во Металург“, изјави Вугринец за ЕКИПА.
Тој дојде во редовите на македонскиот првак, само 48 часа пред стартот на групната фаза во ЛШ, и непосредно пред дуелот со Шамбери во Франција. Експресно ги освои срцата на македонските љубители на ракометот. Иако има 38 години, Вугринец игра врвен ракомет и е многу значајна алка, кај осминафиналистот во најквалитетното европско натпреварување. Искуството на бекот на Металург е непроценливо. Има играно дури 6 полуфиналиња во ЛШ, и едно финале, во 2004 година, кога со Целје го урнаа големиот Фленсбург и ја освоија круната.
„Овој момент и особено атмосферата што се создаде во Македонија, во Скопје и посебно во салата Борис Трајковски, неодоливо ме потсетуваат на тие моменти од Целје. И во Словенија тогаш имаше луда атмосфера, а слично е и сега со Металург. Јас многу добро знам дека не треба да летаме во облаци, но се радувам на успесите со македонскиот шампион. Мило ми е кога ќе видам дека луѓето овде, знаат да ги ценат добрите резултати и игри на Металург. Имам играно во Германија пред 21 илјада гледачи, но ова во Скопје и епизодите од Целје се нешто посебно. Секој меч го играм како да е финале. Морам да ја пофалам публиката која е извонредна и прави да се чуствуваме посебно. Се надевам дека ќе испишеме нова историска страница на клупскиот ракомет во Македонија, со нов триумф против Динамо“, вели Вугринец.
Во сабота, тој повторно ќе биде во строј, и со соиграчите од Металург ќе играат реванш меч против Динамо Минск, за пласман во историското четвртфинале, што би бил највисок дострел на македонска машка екипа во ЛШ. Првиот натпревар во Белорусија, го доби нашиот шампион со 26-23.
за судиите ... Секоја чест за Металург, прекрасно ја претставува државата, и ќе бидам и за било кој друг наш клуб ако вака убаво игра во ЛШ !
..
