Шефот на стручниот штаб на Тетекс, Горазд Михајлов, по стартот на новата сезона во Втората фудбалска лига вели дека клубот од Тетово ќе се бори за експресно враќање во елитното прволигашко друштво. Тој потенцира дека хомогената средина го натерала да остане во Тетекс, во тимот, каде што според него, се афирмирал како тренер.
„Ја познавам одлично средината на Тетекс, и покрај сите шпекулации, јас сакав да останам во тимот. Постоеја неколку понуди кои не беа доволно добри за да го напуштам Тетекс. Јас преку овој клуб се афирмирав како тренер, така што немаше потреба да си заминам, иако тимот испадна во понизок ранг на натпреварување. Верувам дека ќе успееме брзо да се вратиме во елитата, затоа што Тетекс му е неопходен на најквалитетниот домашен фудбал. Што се однесува до актуелната сезона, убеден сум дека Втората лига ќе биде крајно интересна, знаејќи дека во неа ќе се натпреваруваат Победа, Пелистер, Македонија ЃП и многу други екипи кои оставиле голема трага во македонскиот фудбал“ - вели Михајлов.
Во изминатиов период, се најавуваше дека одличниот голман на „текстилците“, Ванче Манчевски, ќе си замине од таборот на „белите“ и ќе направи трансфер во некој од турските клубови. Сепак до такво нешто не дојде, барем засега.
„Ванче бараше од управата да направи трансфер во некој клуб од Турција. Не се договори и навистина не знам каква е неговата ситуација. Останува да видиме дали ќе се врати и дали ќе биде дел од нашиот тим повторно“ – истакнува Михајлов.